California, United States-a khawpui pakhat, Monterey Park-a ballroom dance studio-a silai hmeh puahna thlengah mi 10 an thi niin police-in an sawi.
Police chuan mi 10 dangin hliam an tawrh thu leh silai hmet puaktu nia hriat hi man a la ni lo va, a la hlauhawm reng tih an sawi bawk.
Inkahna hi an ram sanaa Inrinni zan dar 10:20 (India sanaa Pathianni chawhma dar 11:40) pelh hnu deuhva thleng a ni.
Khawpuiah hian Monterey Park Lunar New Year festival hmanna chhim tum mi sang tam tak an pungkhawm a ni.
Los Angeles County Sheriff’s Department chuan silai hmet puaktu nia an hriat chu mipa pakhat niin a tlanchhia a, an zawng mek tih a sawi a. A chanchin dang erawh engmah an la sawi lo.
Captain Andrew Meyer chuan emergency services-ten a hmun an thlen hnuah mi 10 an thi tih hi an nemnghet tih a sawi.
Hliam tuar mi 10-te hi tual chhung damdawi inah dah luh an ni a, thenkhat chu hliam tenau deuh an nih laiin dinhmun tha lo tak tak pawh an awm bawk.
Chhuitute chuan silai hmet puaktu chet chhuah chhan hi hriat theih a la awm lo tih an sawi a, tute emaw huat vanga pawi khawihna (hate crime)-a puh tur pawhin a la hma deuh niin an sawi.
Pathiannia Lunar New Year festival hman tur pawh thulh nghal a nih thu an sawi bawk.
Captain Meyer chuan he thil thlen hnu lawkah hian Monterey Park hmar lam dai, Alhambra-ah pawh thil dang a thleng bawk tih a sawi a, thil chiang erawh a sawi lo.
“A hmunah bawhzuia chhuitu an awm tawh a, thil thleng pahnih hian inzawmna a nei em tih an en mek,” a ti.
Alhambra-a thil thlengah hian thi leh hliam an awm hriat a la ni rih lo va; mahse, police thahnem tak erawhin an awm chilh tih CBS News chuan a tar lang.
Social media-a video thehdarhah chuan Monterray Park khawpuiah hian police an tam hle tih a lang thei a. He khawpui hi Los Angeles atanga khawchhak lam km 13 vela hlaa awm a ni.
Thil thleng hmutu pakhat, inkahna thlenna bul lawka Clam House seafood barbecue restaurant neitu, Seung Won Choi chuan a dawrah hmanhmawh takin mi pathum an tlan lut a, kawngka kalh nghal tur leh pawnah machine gun keng mipa pakhat a awm thu an hrilh niin Los Angeles Times chanchinbu hnenah a sawi.
“Thil thleng hmutute sawi dan chuan machine gun tia an sawi mai, automatic silai keng hi a bul lawka dance studio-ah hian a lut a, a lo awm tam zawk hi Asian-American niin a silai chu vawi tam tak a hmet puak ta a nih,” tiin chanchinbua thawk, Jeong Park chuan BBC a hrilh.
A hnu reilo teah tu emaw chu car-in an tlan zui nghal niin an hrilh tih a sawi bawk.
Festival-a kal mi dangte chuan halpuah puak ri ni awm tak an hriat thu leh thil dang ni tura an ngaih loh thu an sawi hlawm.
“Ngaihthlak chian chuan halpuah ringawt ni lovin ka hre ta a, helai vela thlawk ngai lo helicopter chu kan chungah a lo thlawk ta bawk si a ni,” tiin mi pakhat, Gabriel chuan Reuters a hrilh bawk.