Liverpool leh Chelsea ten Premier League season beiseiawm loh an hmang mek tih chiang takin an tilang a. Inkhel hmuhnawm leh boruak sang tura ngaihah beisei pha lo ve ve in goal inpe lovin an inhnehtawk.
Anfield-ah Inrinni zanah club lian pahnihte an inkhel a. Table laihawla an awm chhan langin football hlauhawm hmuh tur a awm lo.
Chelsea in Kai Havertz hmangin goal an khung chu VAR hmanga endik hnuah pawm a ni lova. Defender thar Benoit Badiashile goal khung tur Liverpool goalkeeper Alisson chuan dansak bawkin a bak goal hlauhawm a tam lo.
Second half-ah Chelsea in Pound maktaduai 89 man forward thar Mykhailo Mudryk an dah lut a. Ukraine winger hi a luh hnuah khelmual a player hmuhnawm ber niin danglamna erawh a team tan a siam thei lo.
Liverpool manager Jurgen Klopp chuan inkhel zawhah, “Han khelhthat lai kan nei a mahse kan chhunzawm rei thei thin lo. Hmasawnna lamah kan hmanhmawh thei lova, mahse pen khatin hma kan sawn a, Chelsea lakah goal kan venghim.” tiin inkhel zawhah a sawi.
Lehlamah Chelsea boss Graham Potter pawhin, “Kan kheltha pangngai in ka hria, kan tha pawh a za tha thin viau. Anfield a inkhelh hi a awlsam ngai lo.” tiin a sawi ve bawk.