Chinese thuneitute chuan Japan tuipuia bungraw phur lawng lian pilah mi pariat thiin an zinga eng emaw zat chu Chinese an nih thu an sawi.
Jin Tian hi Thawhlehni zana a pil hnuah dam chhuakte zawn hna chu ngawrh taka thawh nghal a ni.
Japan-a coast guard leh sipaiten an lawng leh thlawhna an thawh chhuahpui a. South Korea-a coast guard leh mi mal lawng eng emaw zat an thawk chhuak bawk.
Mi panga chhan chhuah an ni a, an dinhmun pawh a tha.
Thawktu mi 22 chuanna, Jin Tian hian Thawhlehni zan khan Japan chhimthlang, tuipuia South Korea nen an inrina bul lawk, mihring cheng an awm lohna Danjo Island khawthlang lam km 110 vela hla, hmun kilkhawr tak atangin an mangan thu an thawn chhuak.
Thi zinga paruk chu Chinese an nih thu Fakuoka, Japan-a Chinese Consul General Lu Guijun chuan a sawi.
Japanese thuneitute chuan Lu-a’n thi zat a sawi hi an la sawi ve lo va; mahse, mi pakua chin an la hriat loh thu erawh an puang a. Lawng a pil chhan hi engmah mumala sawi a la awm lo.
MarineTraffic-in a tar lan dan chuan Hong Kong flag intar lawng hian thla hmasa khan Port Klang, Malaysia a chhuahsan a. Nilainia Incheon, South Korea thleng tura ngaih a ni.