Champhai North Bialtu MLA Dr. ZR Thiamsanga’n chuan a bial chhung Tualcheng leh Hnahlana Special Assistance to State for Capital Investment (SASCI) hnuaia hnathawh dan tur a hmunah kalin Nilaini khan a enfiah.
Dr. ZR Thiamsanga hian Tualcheng tlawh hmasain Tualcheng leh Pamchung inkar kawng laih dan tur enfiahin, “Duhthusama khawih theih a ni dawn lo chungin tun hma aia kawng tha chu a beiseiawm hle a ni,” a ti.
Tualcheng a tlawh zawhah Hnahlan tlawh lehin Hnahlan khawpui chhung chei that dan tur leh inkalpawhna kawng siam dan tur a enfiah leh.
Hnahlan tlangdung a enfiah zawhah Champhai khawpui chhung bika SASCI hnuaia hnathawh – Chhangphut Field atanga Keifangtlang kawng zauh te, futsal ground, district hospital kawng leh khawpui chhung tihchangtlunna tur Champhai PWD EE bakah block hruaitute nen a hmunah kalin an enfiah.
Champhai North Bialtu MLA hian Special Assistance to State for Capital Investment (SASCI) hmangin Rabung paltlanga Hliappui leh Aiduzawl inkalpawhna lai tlangin Ngaizawl atanga Neihdawn inkar a lai tlang tawh bawk.