Ranglong youth association (RYA) buatsaih Ranglong Khohui traditional, cultural & food festival nimina Noagang, Joynagar North Tripura-a neih chu MZP President Lalnunmawia Pautu-in khuallian niin a hmanpui.
Ranglong youth festival (KHOHUI)-ah hian Tripura, Mizoram, Assam leh hmun hrang hrang aṭangin Ranglong hnam ṭhalai ṭhahnem tak an tel a. He hun hmanpuitu MZP President chuan inpumkhatna chungchang sawiin “Tunhnaiah Zofate chenna hmun Myanmar leh Bangladesh te a buai a. Zofa hmun hrang hrang ami ten Zofate Jerusalem kan pan khawm mek a. Zofate inpumkhatna MZP in kan aupui ṭhin pawh a takin a thleng ṭan niin kan hria” a ti.
MZP President chuan “Zofate hi eng dinhmunah pawh ding ila kan awmna hmun ṭheuhah rinawm taka awmin, min thlahtute aṭanga kan chhawm Zonun zemawi vawng reng turin ka sawm che u a ni” a ti a. “Ranglong hnam kan unaute hi Tripura-ah te, Mizoram leh Assam-ah te in awm a, khawi hmunah pawh harsat mangan tawk ula Ranglong hnam kan unaute tan MZP chu a ding reng dawn a, Zofate hi hnam ropui kan nih zia kan lantir zel dawn a ni” a ti bawk.
MZP President hian Noagong-a Synod Mission Compound pawh tlawhin, Synod Mission Compound tan Rs 2000 a hlan bawk a ni.