- Ruata
Maruti Suzuki chuan a vawikhatna atan Nexa-exclusive compact crossover thar Fronx chu Indiaah tlangzarh an tum mek a, hmanni lawk khan Auto Expo-ah Jimny 5-door chhuak thar tur nen an phochhuak a nih kha.
Maruti Fronx hi March, 2023 chhoah lei theih turin an tlangzarh hmel a, tun thla hian a man tur an puarzar theih beisei a ni. A man tur hi company in an la puangzar lo na a, beisei dan chuan Rs Nuai 8 – 11 inkar man a nih beisei a ni a. Maruti Suzuki product range thlir chuan Fronx hian Baleno and Brezza inkar hmunruak a rawn luah thar dawn a nih hmel a ni.
Tlangzarh a nih hunah chuan he Maruti compact crossover thar hian lirthei dang hrang hrang – Tata Punch, Renault Kiger leh Nissan Magnite te a rawn el hmel a. Heng a elpuite hi ex-showroom manah Punch hi Rs Nuai 6 – 9.54, Kiger hi Rs Nuai 6 – 10.77, Magnite hi Rs.Nuai 5.97 – 10.79 te a ni mek a ni. Heng bakah hian sub-4 meter SUV hrang hrang Tata Nexon, Kia Sonet, Hyundai Venue leh Mahindra XUV300 te nen pawh a inel thei dawn a ni.
Maruti Fronx SUV hi variant hrang hrang – Sigma, Delta, Delta+, Zeta and Alpha te a awm dawn a. A model sang, Alpha trim hi hian hmanraw tha tak tak 360 degree camera, Head-up display (HUD), leather wrapped steering wheel, cruise control, 16-inch diamond cut alloy wheels leh dual-tone colour scheme te a nei dawn a ni.
Maruti Fronx in a ken tel tur hrang hrang te hi dual airbag, reverse parking sensor, hill hold assist, rear defogger, electronic stability program, tilt adjustment for steering, powered windows, 60:40 rear seat split, automatic climate control, keyless entry and go, fabric seat upholstery, dual-tone interior leh halogen projector headlamp te a hmang dawn a ni.
A khawl lamah chuan he Maruti compact crossover thar hian 1.0L, 3-cylinder turbo petrol Boosterjet leh 1.2L, 4-cylinder naturally aspirated petrol khawl te a hmang dawn a. He khawl pahnihah hian mild hybrid technology kan hmu a ni. Boosterjet khawl zawk hian 100bhp power leh 147.6Nm torque te a pechhuak thei a. Naturally aspirated petrol zawk hian 90bhp power leh 113Nm torque te a pechhuak thei bawk a ni.
Transmission lamah chuan chi 3 duhthlan tur a awm a, heng te hi 5-speed manual (standard), 6-speed torque converter automatic (turbo-petrol only) leh 5-speed AMT (Naturally Aspirated petrol only) te a ni.
Maruti chuan puangzar lawk lutuk loin hmanni mai khan Fronx hi Jimny rualin an phochhuak kha a ni a. Jimny khan mipuite rilru a luah hneh em avangin Fronx hi mipuiten an hlut tawk loh phah em aw a tih theih a. He crossover SUV mawi tak mai hi, NEXA atanga hralhchhuah tur, man to lutuk si lo, Aizawl khawpui chep lutuk tawha han khalh vel atan phei chuan duhthusam a tih theih a. Lirthei nghahhlelhawm tak a ni a, car te lam leitu tam tak a hip a beiseiawm a ni.