Aizawl : BJP State General Secretary Malsawmtluanga chuan Mizoramin sorkar a hrawn tawhte hi mipui sorkar ni loin, an party mi bakah an vua leh vangte sorkar a nih thu a sawi.
Mamit constituency chhunga khaw hrang hrang a tlawhnaah thu sawiin Malsawmtluanga hian, Zoram zim te, enkawl awlsam takah pawh hmasawnna hnathawh a thuanawm lutuk hi a lungchhiatthlak a tih thu a sawi a. “Sorkar kan hrawn tawh te hi mipui sorkar ni loin, party leh anmahni vua leh vang sorkar anni zel tih hi lalna leh thuneihna an chan hnu hian a chiang thin hle a ni,” a ti.
Malsawmtluanga hian, Mizoram thenawm state te’n nasa taka hmasawnna an kalpui mup mup a, thalai te tan hna tam tak an siam belh a, sorkar hna ruak tam tak hnawhkhah a ni bawk a. Chu’ng state-a sorkarna chelh mek tute chu BJP an ni a. Mizoramah erawh, sorkarin a buaipui lian ber chu sorkar hnathawk te an ni a. Kum tam tak sorkar retheih avangin hna ruak tam tak hnawh khah theih lohin a awm a, state economy pawh a tha lo tak zet a. Chuvangin, Mizoramin sorkar a hrawn mek hi mipui sorkar a nih theih loh thu a sawi.
Kum 30 chuang zet Mizoram hi state a nih hnuah pawh mamit khaw thenkhatah lirthei luh lohna a la awm thei chu mak a tih thu leh zahthlak a tih thu, Malsawmtluanga hian sawiin, “Kan ram zim te enkawl awlsam takah pawh, hmasawnna hnathawh a thuanawp lutuk hi rilru a na hle,” tiin, Mamit bialin BJP MLA a neih a nih chuan a rang thei ang berin lirthei an luh tir dawn niin a sawi bawk.
Malsawmtluanga hi State hruaitu thenkhat te leh Mamit district hruaitu ten an tawiawm a ni.