Bangalore-a Bangladesh mi leh sate inpawngsual thubuai kal zelah an man zinga mi pakhat chu hmeichhe rukbo tur tawktarh nan TikTok a hmang thin tih hriat chhuah a ni.
Ridoy Babu, kum 25 mi hi man tawh paruk zingah telin Dhaka-ah chuan TikTok Hridoy Babo tiin a lar hle a, zuitu (follower) pawh 70,000 vel a nei.
Zirtawpni zing kar khan an mi man pali – Mohammed Baba Sheikh, Ridoy Babu, Sagar leh Hakeel te chu K. Channasandra venga an inluah, Karegowda Layout-ah police-ten hruaiin an dap a, hetih lai hian Sagar leh Ridoy ten tlanchhuah tumin police-te chu an bei a. Police lamin mahni indanna atan silai hmet puakin an pahnih hian an keah kah an ni a, tunah hian damdawi inah enkawl mek an ni.
Police-te chuan Babu-a hming tak chu Rifadul Islam tih a ni a, ani hian hming lem tam tak neiin Ridoy Babu leh Hriday Babo te pawh a lo inti tawh thin.
Ridoy-a hian video-te siamin social network platform-a video an upload-na thinah a dah a. Hmeichhiate nen inkawmnelin hmun hrang hrangah shooting a neihpui thin.
Ramamurthynagar police-te chuan Ridoy-a hi an man zingah hian a mawhphurtu berah an puh.
“Ridoy-a hian hmeichhiate nen video siamin online platform-ah upload-in Bangladesh-ah a lar hle. A larna hi hmang sualin hmeichhiate chu Bangalore-ah hna hmuhsak thei anga insawiin a hralh ta thin a. Damdawi inah enkawl mek a ni,” a ti.