Germany a season duhawm hmang mek Union Berlin in DFB Pokal-ah quarter-final an lut a. Goal chhuah hmasa zawk an ni chungin 2-1 in VfL Wolfsburg an lehthal.
Thawhlehni zanah Stadion An der Alten Försterei-ah Union hian Wolfsburg hi an mikhual a. Inkhelh hma boruakah Spain international Isco an lalut hlawhtling thei lo chuan sawi a hlawh.
Isco hian medical pawh nei fel vek tawh mahse an inremna chu tihfel a nih dawn tawhah Union hian an inrem theih loh thu an sawi.
Inkhel tan atanga minute nga lekah Wolfsburg striker Luca Waldschmidt chuan goal khung nghal in hma an hruai.
Mahse Union in an chhanglet thuai. Minute 12-naah Wolfsburg player hlui Robin Knoche chuan an si phurh a sut a. Bundesliga a pahnihna ni mek team hian minute 79-naah Kevin Behrens hmangin hma an hruai.
Huntawp dawnah an defender Niko Giesselmann hnawhchhuah a ni chungin Union in hnehna an chang ta tho a ni.