English Football League Cup champion Manchester United in FA Cup quarter-final lut turin second half ‘comeback’ hnehna an mamawh a. West Ham United lakah 3-1 a chakin a sang pariat zingah an tel dawn.
Old Trafford a Nilaini zana fifth round inkhelah hian United tan rawlthar Alejandro Garnacho chuan minute 90-naah an hmahruaina goal a khung a. Alphonse Areola tan dan ngaihna a awm lo.
United tan hnehna a chiang tawh a ngaih a nih hnuah huntawp hma in goal khat an la khung belh a. Brazilian midfielder Fred chuan an goal thumna a khung.
Hammers hi first half-ah kheltha zawkah tangin United in ball chang hnem mahse awmze neiin hlauhawm an siam lo. Second half tan tirah an phu zawk angin Said Benrahma hmangin Hammers in goal an khung hmasa.
Second half-ah United an insiamtha a. Midfielder rirnawl Casemiro an dah luh chuan inkhel a thlak danglam. Freekick atang tauh lut mahse a offside avangin pawm a ni lo.
Nimahsela United in minute 77-naah goal an khung thova. Kheltha tak Wout Weghorst-a nawrna avangin Nayef Aguerd chuan an lamah a tauh lut a. Weghorst hi an goal dang pahnihah pawh a inrawlh thui hle.
Inkhel dang
FA Cup fifth round inkhel dangah Championship club Sheffield United in Tottenham an barakhaih a. Iliman Ndiaye goal khung hmangin 1-0 in an hneh.
League Two club Grimsby Town in kum 84 chhunga a vawikhatna atan FA Cup quarter-final khel dawnin 2-1 in Southampton an hneh ve bawk.
FA Cup quarter-final draw :
Manchester City v Burnley
Manchester United v Fulham
Brighton & v Grimsby Town
Hove Albion
Sheffield United v Blackburn Rovers