FIFA President Gianni Infantino chuan tunlaia ram hrang hrangin FIFA World Cup 2026-a Israel teltir lo tura an nawrna chungchangah football-in politic buaina a ching fel thei lo tih a sawi.
Infantino hian Zurich-a FIFA thuneitute thutkhawm a kaihruai a, thu sawiin, “FIFA hian ram hrang hrang politic buaina hi a ching fel thei lo a, a tih theih thung chu khawvel hmun hrang hranga football dinhmun chawisan leh tihlar a ni a. Hetiang ti tur hian hnam nihphung te, zirna te leh mihring mihrinna a tibuai ngai lo a ni,” a ti.
“FIFA chuan football hmanga ram hrang hrang phuar khawm a tum ber thin a, tuna khawvel hmun hrang hranga buaina leh harsatna tawk mekte chu kan rilruin kan hre reng a. Football atanga kan tih theih ber chu remna leh muanna thleng se kan duh hle tih hi a ni,” a ti bawk.
Meeting an neih hnuah hian Infantino chuan FIFA hmunpuiah Palestina rama football hruaitu lu ber, Jibril Rajoub a kawm zui a, hetah hian an pawlin harsatna an hmachhawn mek an lo dawnsawn dante chu a fak.
Europe-a football hruaitu langsar tak takte chuan Gaza-a an chet dan avangin Israel an do nasa hlawm hle a. Thawhtanni kal taah khan US President Donald Trump leh Israel Prime Minister Benjamin Netanyahu chu White House-ah remna chungchang sawiin an inkawm bawk.
Infantino chuan mi 37 telna FIFA ruling council thutkhawmnaah remna leh muanna te, inlungrualna te a pawimawhzia a sawi a. He hunah hian Gaza chungchang chu sawi chiang dawt lo mah se a tinzawn ber niin a ngaih theih a, Israel hming erawh a lam ri lo a ni.
Israel mipa football team chuan World Cup qualifying an khel ve mek a, October 11 hian Oslo-ah Norway an luhchilh dawn a,ni thum hnuah Udine-ah Italy nen an inkhel zui ang.
Norway chu Europe-a football pawl hrang hrang zinga UEFA hnena Israel hrem tura nawrtu zingah an tel a. Israel chu World Cup khel thei lo tura hrem an phut a, Turkey pawhin UEFA leh FIFA hnenah Israel chu inkhel ve thei lo tura hrem turin an phut bawk.
World Cup khel ve thei lo tura Israel hrem duhtu hi an thahnem angreng hle a, mi 20 awmna UEFA committee sang chuan an pawmpui a rinawm lem lo thung a. He ngaihdan hi Israel leh Germany te chuan an thlawp ve lo a ni.
FIFA leh Infantino pawhin Israel hrem hi an kal tlangpui a rinawm lo a. Kar hmasa khan World Cup thlengtu tur pakhat, USA-a State Department chuan football huanga Israel dinhmun chu chhan tlat an tum thu an sawi a ni.
Trump-a leh Netanyahu te inkawm chu Middle East sawrkar, Qatar te pawh telin an lawm hlawm hle a. Qatar hi Palestina mipuite thlawptu an ni a, September 9-a Doha-a Hamas thuneitute an beih chungchang vangin White House atangin Qatar prime minister chu Netanyahu chuan biain ngaihdam a dil a ni.
Qatar hi UEFA nen sumdawnna leh infiamna huangah an inzawm tha hle a, UEFA President Aleksander Ceferin bakah Paris Saint-Germain President Nasser al-Khelaifi te chu FIFA inhmuhkhawmah an tel ho a. al-Khelaifi hi member 700 awmna European Club Association hruaitu lu ber a nih bakah Qatar sorkara mi pawimawh tak a ni bawk.
2022 World Cup-ah khan Ukraine rûntu, Russia chu FIFA-in an tel ve an phalsak lo tawh a, khatiang deuh khan Gaza-a che nasa, Israel chu 2026 World Cup-ah tel phalsak lo turin FIFA hi an nawr nasa hlawm hle a. FIFA hian Israel hrem kher tul an tih loh hmel a ni.