Nagaland chuan state an nih atanga kum 60 zet hnuah a vawi khat nan hmeichhe MLA an nei ve dawn ta.
Hekani Jakhalu-i hi BJP thawhpui, NDPP candidate niin Dimapur III bial atanga thlan tlin a ni.
Kum 48 mi, lawyer-activist hi tun tum inthlana chuhtu mi 183 awma hmeichhia pali zinga mi a ni a. Lok Janshakti Party atanga chuhtu, Azheto Zhimomi chu a hneh a ni.
NDPP-in an candidate tho, Salhoutuonuo Kruse-i pawhin Western Angami bialah hma a hruai mek bawk a, he chanchin ziah lai hian a dinhmun erawh hriat hman a ni lo.
NDPP-BJP tang dun hian Nagaland-ah hian thuneihna an chang zui leh ngei dawn niin a lang a, bial thum la tawhin bial 35-ah hma an hruai mek.
NDPP hi Chief Minister Neiphiu Rio-a kaihhruai niin kum 2018 inthlan atang khan BJP nen thawk dunin sorkarna an siam a. Party thawkhote hian inthlan hnuhnung berah hian bial 30 an la a ni.