Aizawl: Chief Minister Zoramthanga’n Lunglei Municipal Council (LMC) inthlan hmasa bera tlingte a lawmpui thu a sawi.
LMC inthlan result puan zawhah social media Instagram kaltlangin chief minister hian thuchhuah a siam a, “Mizoram hmasawnna hmachhawp tam takte zinga mi, LMC-in a taka hna a thawh theihna tura a puipa turte thlanna hun tluang taka Pathian zara kan zo thei hi ka lawm khawp mai. Party hrang hrangten candidate tha tak tak Lunglei mipuite tan kan thlang chhuak a, mipuiten an aiawh tur an duh ber an lo thlang hi ‘democracy’ ropuizia leh hlutzia tichiangtu a ni tih i hre nawn fo ang u,” a ti.
Mizoram chanchina mellung pawimawh, LMC inthlanna felfai taka huaihawt a nih theihna tura rim taka thawktu official-te chungah lawmthu sawiin chief minister hian, “Party hrang hrang candidate tling zo ve ta lote pawh hrehawm ti lova mahni hmazawn theuha Mizoram hmasawnna tura awl lo va thawk chhunzawm theuh turin ka sawm che u,” tiin, ram hmasawnna tur mawhphurhna chang tharte a lawmpui thu leh Mizoram tan theihtawp chhuah zel turin a chah.