Aizawl: Mizoram Pradesh Congress Committee (MPCC)-in Bhavan, Aizawl-ah Lunglei Municipal Council (LMC) inthlan result puan tak an thlir let a, he hunah an president, Lalsawta’n chak tura an thawh leh tur thu a sawi.
Congress President Lalsawta hian LMC inthlanah theihtawp an chhuah tih sawiin, “Kan hah tlang em em a ni. Chuti chung chuan kan hlawhtling zo ta lo va, hetah hian tumah dem tur an awm lo. Pathian duh dan anga Mizorama thil a thlen theihna turin kan thawk zel dawn a, kan beidawng dawn lo, kan phur sauh sauh zawk a ni. Vawiinah hian kan tlu a, tlu hlen reng tur kan ni lo, chak turin kan tho leh ang,” a ti.
ZPM duhsakna hlanin Lalsawta hian, “Sum chakna hmachhuan loin kan candidate-ten theihtawp an chhuah a, tunah hnehna chang rih lo mah ila mipui rilruah sum leh pai hnawl duhna thuk takin an tuh a ni. Sum hmang tam tam chak tur ni se, state sorkar fawng vuantu MNF party candidate-te eng party mahin kan hneh a rinawm loh,” tiin ZPM chu an hlawhtlinnaah a lawmpui a, LMC sorkar tha tak siam turin duhsakna a hlan.