Aizawl : Environment, Forest & Climate Change Minister TJ Lalnuntluanga’n Mizo thalai zingah social media hmansualna a tam nia sawiin, A chhe lai haichhuaka seltu mai ni lova siamtha tura a taka thawkchhuak nih a pawimawh thu a sawi.
Conservator of Forest, Northern Circle Office leh Quarters, Project Veng, Kolasib ami leh Bairabi-a Forest Rest House zauhna a hawnnaah he thu hi nimin khan EF&CC Minister chuan a sawi a. Social media-ah midangte hlawhtlinna leh hmalakna chawh phur leh lawmpui aia seltu leh deusawh zawnga thuziah hmuh tur a tam thu sawiin, ram leh hnam hmasawn nan mahni hma zawna mawhphurna awm te hlenchhuak tura a tak thawhchhuah a hun takzet thu a sawi.
TJ Lalnuntluanga chuan ram leilung humhalh turin EF & CC department-in dan hrang hrang a kenkawh thin thu sawiin, dan bawhchhiate hrem an ngaih thin thu leh dan hnuaia phalna nei te, zawm tur ang tha taka zawm ten harsatna an tawh ngai loh thu a sawi a. Chhuan lo la awm leh zel tur te tan ram leilung hausakna humhalh chu mitin mawhphurhna a nih thu a sawi.
Mizorama Forest division 5-ah Green India Mission kalpui mek a nih thu pawh EF&CC Minister chuan sawiin, Forest division zawng zawngah kalpui tura hmalak mek a nih thu a sawi a. Hemi hnuaiah hian huan nghet nei tura thei huan siamtute țanpuina tur ruahmanna pawh a awm thu a sawi.
Ram ngaw leh nungcha hlutna inzirtir nan Aizawl Zoological Park pawh tihchangtlun zel a nih thu TJ Lalnuntluanga chuan sawi- in, Nandankanan Zoo atanga Sakei pahnih lakluh a nih thu leh ni 15 dahhran (quarantine) hnuah Sahuanah mipui hmuh theiha a awm tur thu a sawi a. Ram ngaw humhalh nana Nagar Van scheme hnuaia ruahmanna te, CAMPA hnuaia hmalakna leh tuihna humhalhna tura JICA nen ruahmanna siam mek a nih thu te a sawi bawk.