Ukraine chuan an ram khawchhak lam, tun hnaia nasa taka an inchuh lai, Bakhmut-a industry tamna, Kostyantynivka khawpui chu Russian-ten nasa takin an kap tih an sawi a, civil mi paruk vel an thi niin an sawi.
Missile leh rocket hmanga an beihnaah hian apartment block 16 leh in dang a chhia a, heng zingah hian nursery school pawh a tel niin presidential staff hotu, Andriy Yermak chuan Pathianni khan social media-ah a tar lang.
He khawpui hi Bakhmut atanga khawthlang lam km 27 chauhva hla niin tun hnaia inbeihnaa ram pahnih sipaite an thi hnem tawh hle.
Yermak-a chuan Russian-te hian Kostyantynivka hi S-300 surface-to-air missile leh Uragan rocket hmangin an kap niin a sawi a, mi pariat velin hliam an tuar bawk tih a sawi.
Kostyantynivka hi Russia-in Donetsk region pum a thunun theih nana lak tuma a beih nasa, Kramatorsk leh Slovyansk khawpui hnaih taka awm a ni a. Russia-in February, 2022-a Ukraine a rûn hma khan mi 70,000 chuang an cheng thin.
Pathianni vek khan Russian-te luah lai, Melitopol-ah eng emaw a puak niin chhim lam khawpuia Ukrainian mayor Ivan Fedorov chuan a sawi a. He thil puak hi rail depot beihna niin a sawi bawk.
Melitopol hi Ukrainian-te hian missile-in an bei nasa a, Russian sipaite chak lâkna ber niin an awp lai, Crimea bul maia awm a ni.
Inrinni khan Russian Defence Minister Sergei Shoigu chuan an commander-te chu an ralthuam siam chhuah tichak turin a nawr a. “Puak thei mamawhna a sang a, a siam chhuah tihchang leh tihtam a ngai,” a ti.
Military analyst-te chuan Russia hian Ukraine a kahnaah a hman nasat em avangin ralthuam a indaih lo deuh tan niin an sawi.
Shoigu leh defence ministry hi Russia-a Wagner mercenary group hotu, Yevgeny Prigozhin chuan an sipaite mamawh an pek theih loh avangin an sawisel a. Private military company tia sawi, Wagner hi Bakhmut indonaah an che chhe hle a ni.
Ukraine President Volodymyr Zelensky chuan indonaah thi tam hle mah se a sipaite chuan Bakhmut an luah a, an tlawm dawn lo tih a sawi a. Hetih lai hian ni rei vak lo liam ta chhungin Russian-ten hma an sawn leh hret niin an sawi.
Bakhmut hi khawpui pawimawh tak a ni a, hetih lai hian Ukraine chuan Russia hi sipai hmanrua leh sipai hrim hrim an tlachham tan niin an hria.