ZPM President Lalliansawta’n Lunglei Municipal Council sorkar hmasa bera a fawng chelhtu ni tura Lunglei mipuiin an duhsaknaah lawmthu a sawi a. Vawiinah LMC sorkar thara hotu turte puan a ni dawn.
LMC inthlanpuia hnehna an chan chungchanga The Zozam Times-in a kawmnaah ZPM president chuan ward zawng zawng an lak fai vek an beisei pha lo tih a sawi a, “Rilru-ah chuan kan tih fuh chuan a ruh puk theih loh maw, te chu kan ti a; mahse, kan beisei ngam lo,” a ti.
Lunglei mipuiin LMC enkawl tura sorkarna an pek chhan chu kalphung thar, mipui sorkar an duh vang nia a lan thu sawiin, Lalliansawta chuan, “Kan party hi a la naupang hle a, chuti chung chuan mipui sorkar din kan tum hi mipuiin an hre tawh hle,” a ti a. Vote petu Lunglei mipui chunga an lawmzia chu hriatsak se a duh thu a sawi.
ZPM president chuan LMC sorkar thara chanvo an inpek dan tur chu thlan tlinte nen sawiho a ni dawn tih a sawi a. An wokring president-in a awmchilh thu leh nizan khan thlan tlin tharte nen an thutkhawm tur thu a sawi a. An lo rel fel hnuah vawiin hian president-in a puan tur thu a sawi.
LMC inthlan result puan a nih hnu khan Aizawla ZPM Headquarters Office leh Lungleia ZPM Southern Hqrs. Office-ah te inkhawm neih a ni a, Lungleia hun an hmannaah hian working president chuan thu sawiin, LMC inthlana ZPM party hnehna chu Lunglei mipuite hnehna a nih thu a sawi a ni.