Barcelona in pen khatin La Liga champion nih an hnaih leh a. Real Betis lakah 4-0 a hnehna changin point 11 in table chung berah hma an hruai chhunzawm.
Inrinni zana Spotify Camp Nou a inkhelah hian Barca tan Andreas Christensen, Robert Lewandowski leh Raphinha ten goal an khung a. Barca in an La Liga title 27-na la turin dinhmun tha an luah mek a. Khelh ruk chiah an hmabak tawh.
Real Betis hi season tharah European football khelh inbeisei mek an ni a, an defender Guido Rodriguez chuan huntawp hma deuhin Barca goal li na an lamah a ti lut. Hei chauh hi ni lovin darkar chanve vel chauh an inkhel hman tihin Betis defender Edgar Gonzalez chu hnawhchhuah a ni.
Barcelona manager Xavi Hernandez chuan, “Vallecas a tlawm kan phu hnuah kan thawh lehnghal a pawimawh a. Zaninah bul kan tan tha a, first half-ah inkhel kan dahtha.” tiin a sawi.
Inkhel dangah Barcelona hnuai a awm Real Madrid in Almeria an mikhual a, 4-2 in an hneh.
Real tan French striker Karim Benzema chuan minute 5, 17 leh 42-ah te goal a khung a, tun season-ah a vawi thumna atan hattrick a siam. Rodrygo chuan an goal dang a khung ve bawk.