Indian Premier League champion lai Gujarat Titans in bat leh ball hmanga an chetthat rual avangin Kolkata Knight Riders lakah wicket 7 in hnehna an chang a. League table-ah hma an hruai.
Kolkata a Eden Gardens a inkhelah hian a thlengtu team tan inhliam Jason Roy aia khelh tir Rahmanullah Gurbaz chuan ball 39 lek atangin run 81 siam mahse KKR hian run 179 an siam.
Titans bowler zingah Mohammed Shami chuan wicket thum la in Noor Ahmad leh Josh Little ten wicket hnih ve ve an la a, KKR middle order an thiat hnehsawh.
Titans tan opener Shubman Gill chuan run 49 a siam a, anni pawhin Wriddhiman Saha leh captain Hardik Pandya te wicket hloh hma mahse Vijay Shankar leh David Miller ten a tawp an khar a. Out lova ding tlangin Shankar hian ball 24 atang run 51 a siam a, Miller-a’n ball 18 atangin run 32 a siam ve bawk.
Inrinni inkhel hnuhnung zawkah Delhi Capitals tan Mitchell Marsh chuan wicket 4 la in run 63 siam bawk mahse hnehna chan nan a tawk lova. Sunrisers Hyderabad in run 197 an siam laiin Capitals hian 188 bak an siam thei lova, Sunrisers hi run 9 in an chak.