Aizawl : YMA Sub-headquarters, Khawzawl-in Zirtawpni khan Sialhawk Community hall-ah inkhawmpui vawi 1-na an hmang a, a hmanpuitu Deputy Chief Minister Tawnluia’n YMA member te chu ruihhlo do kawnga thawhhopuiah a sawm.
Tawnluia chuan YMA memberte chu an awmna hmun apiangah hnam nunphung, nihphung leh ziarangte chawinung zel turin a chah a. Ruihhlo do kawngah tha thlah a thiang lo tih sawiin, kan tu leh fate bakah keimahni tan pawh a ni tel tih hriaa beidawng lo leh tha thlah lova theihtawp kan chhuah tlan tul tak meuh, a ti.
He inkhawmah hian Ph. D zirlai Lalsiammawii, Sialhawk hnenah Tawnluia chuan laptop a hlan a, Khawzawl Sub-Headquarters YMA khawmpui senso phuhruk nan Rs. 3,00,000 hlanin, Sub-Headquarters YMA office zauhna tur pawh theihtawp chhuaha tanlakpui a tum thu a sawi a ni.
Inkhawm hi Khawzawl Sub-Headquarters YMA Vice-President C. Lalhmingmawia’n a kaihruai a, YMA member boral mi 122 sunna hun an hmang a, Central YMA hruaitute kaihhruaina hnuaiah kum 2023-2025 chhunga hruaitu tur an thlang bawk.
YMA Sub-Headquarters, Khawzawl hnuaiah hian YMA Branch 41 awmin YMA Group 4 a awm a, Sub-Headquarters YMA office hi Khawzawl Dinthar vengah neiin, tun dinhmunah member 19299 an awm mek a ni.