State level sub-committee on Green Mizoram-in kumina Green Mizoram Day thupui atan ‘Thingphun ila, enkawl zui ang u’ tih an thlang a. Thing lian sa phun rawtiin, Green Mizoram Award siam an rawt bawk.
Green Mizoram Day hman dan tur ngaihtuah hian vawiin khan Forest Minister TJ Lalnuntluanga hovin State level sub-committee on Green Mizoram chu an thukhawm a. Kuminah Green Mizoram Day June ni 11 chu Pathianni a nih avangin June ni 9-ah Chief Minister hova hman tura relin, state level leh district level-a kangmei veng tha district leh khua lawmman pek thin pawh chhunzawm ni se, an ti.
‘Green Mizoram Day’ hi kum 1999 atang khan hman tan niin, kumtin June ni 11-ah hman thin a ni a. Nikum Green Mizoram Day-ah thing tiak 19261 phun niin, thing tiak 118540 semchhuah a ni bawk a ni.