Oriflame MFA Cup 2023 final-ah TMFC, Melbuk in hnehna an chang a. 1-0 in a thlengtu district aiawh Khawzawl Vengthar GSA hnehin an champion.
Inrinni a final inkhelah hian halftime dawnah Lalchhuanmawia chuan Melbuk team TMFC tan goal a khung a. He goal hi hum tluanin an champion-na a ni.
Team pahnihte hi league round-ah an inkhel tawh a, goal inpe lovin an lo inhnehtawk tawh.
Final inkhelah pawh hian an pahnih inkar a tam lova, inkhel inhnehtawk tak an khel.
A thlengtu team lamin nidangah football hlauhawm an khel thin, tun tumah erawh an thei bik lo. Coach Lalsangzuala Hmar in ruahmanna a siam fuh a, a team an nghet.
Mimal chawimawinaah Melbuk captain leh an player pawimawh Zonunmawia chu Best Player a thlan a ni a. Saitual District aiawh Melveng FC rinrawl Jacob Lalhruaisanga chu Top Scorer a thlan a ni.
Oriflame MFA Cup 2023 lawmman :
Champions – TMFC, Melbuk, Champhai District
Trophy + Rs 1,00,000
Runners Up – Vengthar GSA, Khawzawl District
Trophy + Rs 50,000
Best Player : Zonunmawia
Top Scorer: Jacob Lalhruaisanga, Melveng FC, Saitual District
Fair Play Award : Lawngtlai Vengpui FC