Mizoram ramri depa cheng hnam dangte hian dam khawchhuah khel vek an nih avangin Mizote hi an la luahlan thei niin Central YMA Vice President Lalhmachhuana’n a sawi.
Zirtawpni zan khan Maubawk Branch YMA chuan YMA kumpuan ‘Ram leh Hnam Humhalh’ hawnna hun hmangin, Central YMA Vice President Lalhmachhuana’n a hmanpui a. “Ram leh hnam humhalh kan tih hian kan thlir zau lutuk thin a, ramri chungchangte, kan tualchhunga ruihhlo hluarte kan khawtlang nuna kan fel tawk lohnate kan thlir thin a, keimahni kan inthlir kân daih zel a ni,” a ti.
Lalhmachhuana chuan, “Kan hriatreng tur chu Mizoram ramri km 772 pawn lama awmte hi dam khawchhuah khel vek an ni a, heng zingah hian kan chipuite pawh an awm. India ram khua leh tui nih khel ngar ngarte pawh an awm a. Min hual veltute hi nun khawchhuah khel vek an ni a, anni chuan hnathawhna chang an hria a, keini a ramchhung mite zawk lah hi kan awm mai mai a. Hna kan thawh ve chhun lahin tawrh chhelna kan tlachham a, anni chuan chhel takin hna an thawk a, hetiang renga kan kal chuan min la luahlan thei tih kan hriat a tha hle a ni,” a ti bawk.
Mizote hi hlawkna duh vangin a dik leh dik lo an ngaihtuah hman lo tih sawiin Lalhmachhuana chuan, “Hlawkna kan duh avangin midangin tuar mah se pawi kan ti tawh lo. Hei hian kan khawtlang nun hona a tichhia a, thlantlaa hnathawh ai chuan dik vak lova sum lak luh kan duh tawh zawk a, hnathawh thuamhnaw haa thlan tlaa hlawh hmuh ai chuan smart taka mi bum ching kan ngaisang a, hengte hi kan sim a hun tawh hle. Hei hi siamtha tur chuan ram leh hnam humhalh kan tih hian a huam tel vek a ni,” a ti a; mi tlem te-ten an tih hram hramna avangin Mizo hnam hi tundinin a la awm thu leh a la tlusawp lo mai mai niin a sawi.