Sudan khawpui, Khartoum-ah chuan mipuite hmun hima an insaseng theih nan inkahhai puang mah se awmzia a awm lo va, hmun tinah silai puak thawm a awm reng.
Pathianni khan sipaite chuan paramilitary force-te um chhuak turin khawpui hi thlawhna leh ralthuam lian chi hmangin kil hrang hrang atanga an beih thu an sawi.
Inkahhai puan chu Pathianni zana tawp tur chauh a la ni a. Mi maktaduai tel khawpuiah hian ei leh in tur nei mumal tawh lovin an tang mek.
Ram dangte chuan an mite chu buaina karah an hruai haw hlawm.
April 15 atanga sipai leh Rapid Support Forces (RSF) inbeihna avang hian mi 500 chuang an thi tawh anga chhinchhiah a ni a; mahse, a tak taka thi leh hliam chu an tam zawk hle rin a ni.
Army commander Gen Abdel Fattah al-Burhan leh RSF chief, Hemedti tia hriat lar, Gen Mohamed Hamdan Dagalo te pahnihin thuneihna an inchuhna avanga inbei an ni ber a. RSF-te sipaia tan zuitir vek tumnaa inmil lo an ni bawk.
Ningani zan khan an thenawm ramte bakah US, UK leh UN ten palai hna thawka inkahhai puang tura an dawrna chu a hlawhtling hram a; mahse, darkar 72 awh tura duan hi a tak takah erawh a ralmuan phah lo.
Inrinni tlai atang khan Khartoum-ah hian nasa taka inkahna a awm zui nghal a. Army chuan khawpui hmar lama RSF sipai awmte an luhchilh niin an insawi.
Thil thleng hmutute chuan army drone-ten tuialhthei thlitfimna hmunpui bul lawka RSF tanhmun chu a bitum niin Reuters news agency hnenah an sawi.
“Indo thlawhna thawmin min tiharh leh a, kan thenawm vel zawng zawngah thlawhna kah thlakna hmanraw ri a ri chuah chuah a ni,” tiin mi cheng pakhat chuan Pathianni khan AFP news agency a hrilh.
Chanchinbumite chuan army tan Khartoum atang hian RSF um chhuah mai chu thil harsa a ni rih niin an sawi.
Army hian hmanrua an nei tha zawk ngei a; mahse, RSF hi an tuan a thain khawpui chhung inbeihnaa chetla thang leh zir nasa zawk an nih avangin hneh mai an harsa dawn niin an sawi.