Football atanga mipui hriat hlawh Lalnghinglova Hmar (Tetea Hmar) chu vawiin khan midang engemawzat rualin ZPM Leader Lalduhoma’n ZPM party-ah a lawmlut.
Lalnghinglova Hmar chuan ram siamthat beiseina nei chunga ZPM chu zawm a nih thu a sawi a. “Beidawngte karah beiseina nei tlat mi tam tak kan la awm a, ‘an ni pawh sorkar se engmah tak tak an ni chuang lovang ti fotute hi mi beidawng an ni” an ti.
“Tam takin tih tur an sawi thin a, ZPM pawhin tih tur tam tak a ruahman, an tih ve loh tur pawh an sawi a, hei hi ropui ka tih lai chu a ni” Lalnghinglova Hmar chuan a ti a. “Kan tih tur kan sawi rual hian kan tih loh tur, kan kalsan tur leh kan bansan tur tam tak a awm a, chu chu kalphung thar pawh hian a kawh a ni awm e” tiin, “Hetianga kan sawi hian inti fel bik leh inti thianghlim bik nia inpuh zuina a awm duh hle, chu chu beidawnna zawk chu a ni” a ti.
Amah ang bawka ram siamthat tak tak duh, beiseina nei tlat mipui, thalai leh kohhran rawngbawltu an tam nia sawiin, “‘Kan danglam dawn’ ti ngam leader Pu Lalduhoma kaihhruaina hnuaia kum 2023 kum tawpah sorkar thar siama, chuta tel ve thei tur leh ram tana ke ka pen ve tur hi ka lawm takzet a ni,” a ti a. “Beiseina kan nei a, ram hi siamthat theih a la ni, beiseina mei kan chhi alh zel dawn” a ti bawk.