Aizawl : Zoram Peoples Movement (ZPM) in an party-ah Lalnghinglova Hmar (Tetea Hmar) lawm lut dawn.
Thudawn danin, Thawhtanni hian ZPM in an party pisa-ah chhung inkhawm leh an party-ah mi thar lawm luh inkhawm an hmang dawn a. He hunah hian kumin tawpa MLA inthlanpui lo awm tura an inbuatsaihna atana Aizawl West II bial vil tura an ruat Lalnghinglova Hmar bakah mi eng emaw zat an lawm lut dawn a ni.
ZPM-in Lalnghinglova Hmar hi Aizawl West II bial vil tura an ruat niin, ZPM candidate tura rin a ni bawk a. Ti hian, helai bialtu MLA ni mek, MNF sorkara Cabinet Minister Lalruatkima nen an inkhing dawn tihna a ni.
Lalnghinglova hmar hian kum 2019 Lok Sabha inthlanah khan Independent candidate in a lo chuh tawh bawk.
Ruahman lawk dan chuan ZPM chhung inkhawm hi ZPM Election department General Secretary R Lalchhuanmawia’n a kaihruai dawn a, ZPM President Lalliansawta’n an party zawm thar te a lawm lut dawn a, thu a sawi nghal ang a. Lawm luh te atangin thusawi a awm bawk ang.
He hun hi ZPM official Youtube channel lamah live-a pek chhuah tura ruahman a ni bawk.