All Bodo Students’ Union (ABSU) chuan Delhi University-ah Bodo Department bik hawn an ngiat a. He thu hi Mungkhlong Fwthar, Borpukuri, Gohpur-a kum tina an neih \hin, conference vawi 53-naah sawi chhuah a ni.
Ni thum awh inkhawmpui an hmanah rorel palaite chuan khawtlang zirna leh ei leh bar zawnna kawnga Assam-in hma a sawn dan tur an sawiho niin ABSU speaker Phanin Boro chuan a sawi.
ABSU hian Prime Minister Narendra Modi, Union Home Minister Amit Shah leh Assam Chief Minister Sarbananda Sonowal bakah Finance Minister Himanta Biswa Sarma te chu kum khat chhunga MoS hnuaia BTR Accord clause hrang hrang an tihhlawhtlinsak avangin lawmthu an hrilh bawk.
ABSU hian sorkar laipui leh an state sorkar chu BTR Accord hnuaia tihhlawhtlin loh an la neih ang angte pawh a ranglama tifel zo thuai turin an ngen.
Bodo students’ union hian an state sorkar hnenah Bodo Kachari Welfare Autonomous Council hnuaia roreltu turte pawh ruat lailawksak turin an ngen bawk.
BTR Accord hnuaiah hian Karbi Anglong leh Dima Hasao hmuna Bodo chengte tan Scheduled Tribe (ST) Hill nihna pe turin an ngiat bawk.
Sonitpur leh Biswanath district chhunga Tribal chengte tan FRA Act, 2006 hnuaiah ram pek phalna pawh BTR Accord hnuaiah hian a awm.
NDFB mi leh saten police thubuai an lo neih tawh zawng zawng leh tan ina tang zawng zawngte pawh ABSU chuan chhuah turin thutlukna an siam tel bawk.
ABSU hian sorkar hnenah BTR leh Assam hnuaia school leh college awm zawng zawng pawh assembly inthlan leh hmain BTR Accord hnuaiah hian an hnam kal dana thlak vek an phut a ni.
Lower primary, upper primary leh high school-a hna ruak awmte pawh a rang lama hnawh khat tura an duh bakah college leh university hnuaia Bodo Department-a hna ruak awmte pawh ABSU chuan hnawh khah an duh thu an tar lang bawk.
TET (Teachers’ Eligibility Test) paltlangte chu Bodo medium school-ah thun luh zel an duh a. Hei hian zirtirtu indaih lohna awm thin pawh a tihziaawm an beisei.
BTR, BKWAC Assam hnuaiah Bodoland Skill Centre din an ngiat bawk a. He hian Bodo mite chu zirna leh kawng hrang hranga inelna awm theiah a chher hriam dawn a ni.