India chhim lam, Kerala-a ramhnuaia tla thin sai, khuaa a luha a chet dan avanga sawi hlawh tak chu tiger reserve-ah dah let leh a ni ta.
Thuneitute chuan Arikomban (Malayalam tawnga ‘rice tusker’ tihna) tia a hming an phuah hi ramhnuaiah an dah tih an sawi a. Tual chhung mite hian buhfai zawnga dawr a beih thin avangin a hming hi an phuahsak a ni.
Tual chhung mite hian a awmna hmun ngaiah dah let leh turin thla eng emaw zat chhung an lo nawr tawh a ni.
Inrinni khan kah mut niin Periyar Tiger Reserve-ah dah luh a ni ta a ni.
Sorkar thuneitute chuan an tum an hlawhtling tih sawiin Arikomban che vel hi an thlithlai reng dawn tih an sawi a, a taksaah radio collar dahin an en reng thei tih an sawi.
Hetih lai hian activist-te chuan mihring leh ramsa inkara buaina chu ramsa pakhat awmhmun sawn maiin a fel lo tih an sawi.
Kum 2017-a India-a sai chhiarpui neih hnuhnung berah khan 30,000 dawn an awm a, heng zinga 60% vel hi Asian elephant an ni a. An khawsakna hmun suasamsak nasat avangin mihring chennaah lutin a che ta vak thin a, hei hi buaina bul a ni.
Arikomban hi kum 30 chuang ni tawh tura ngaih a ni a, Devikulam forest range, Idukki district-a chengte chuan tun hma atang tawhin an lo hmuh fo tawh a ni.
Tual chhung mite chuan tun hma deuh chuan mau leh dia sak inte tichhiain ei tur a zawng thin a. Mihring pung zelah in a tam a, concrete a tam zel bawk a, nasa zawka chein mihring tana hnawksak tak taka awm a ching ta hle niin The New Indian Express chanchinbu hnenah an sawi.
State forest department chuan Arikomban hi mana zirtir an tum a, hei hi ramsa humhalh pawlten duh lovin Kerala High Court-ah petition an thehlut.
Sorkar chuan court-ah hian mi pasarih a tihlum tawh niin an sawi a. Activist-te erawh chuan tumah a tihlum lo niin an sawi ve thung a. Hei hi a chetna hmun vela tribal chengte an kawmna atanga an hriat niin an sawi.
Tun hnaiah man tumin nasa taka beih niin mi 150 chuang an thawk chhuak a, ni hnih zawh a nih hnuah hmuh fuh a ni ta a, an kap muhil a, tiger reserve-a chentir tumin a awmna hmun sawnsak a ni ta a ni.