- Ruata
Maruti Suzuki chuan Multipurpose Vehicle huangah lirthei thar, a changkang chi (premium) an tichhuak dawn tih an lo puang tawh a, tuna rawn chhuak tur hi Toyota Innova Hycross te nena inel thei tur a ni dawn a, July thlaah hian kan hmuh hman hmel a, hei erawh puan chian a la ni lo thung a ni.
MPV hi ‘van’ lian leh changkang ho tih te pawhin a sawi theih ang a, MPV lar ho hi chu Toyota Innova ang te hi a ni a. Hetiang lirthei huangah hian MPV satliah ni loin a changkang lehzual, premium MPV chu Maruti Suzuki atangin kan hmu dawn ta niin a lang a. Tunhnai khan Toyota Innova chi thar, Hycross tihchhuah a ni a, hengte nen hian a inel thei tura beisei a ni.
Maruti premium MPV tharah eng nge kan hmuh dawn
Toyota leh Maruti Suzuki hi kan hriat tawh angin an thawk dun a, lirtheite pawh thuhmun, hming hrang si an lo nei nual tawh a. Tuna MPV thar tur pawh hi Innova Hycross ang deuh chiah, Maruti Suzuki hming pu a nih hmel a. Grand Vitara kan hmuh mek pawh hi Toyota Hyryder nena inang niin Toyota Bidadi plant-a siamchhuah a ni a, Maruti Suzuki lamah an pe chhawng veleh a ni a, tuna MPV thar tur pawh hi hetiang deuh tho hi a nih hmel a ni.
Maruti premium MPV thar, Maruti hmingpu Toyota lirthei hmasa ber tur?
Kum 2017 atanga Toyota leh Suzuki an thawhdun atang khan lirthei hrang hrang te chu a hming thlakin company hming dang put tir a lo ni thin tawh a. Maruti Suzuki Brezza chu Toyota Urban Cruiser angin a chhuak a, Maruti Suzuki Baleno pawh Toyota Glanza angin. Tuna Maruti Suzuki lirthei thar ber ber Baleno, Ciaz, Ertiga leh Celerio te hi international market thenkhatah chuan Toyota lirthei angin a chhuak mek bawk a. Toyota in anmahni company hminga Maruti Suzuki lirthei an thlak a la ni deuh zel a, tuna mi hi ramchhunga Maruti in Toyota lirthei hming an thlak ve vawikhatna tur a nih hmel a, NEXA dealership kaltlanga hralhchhuah tur a ni dawn a ni.
Eng nge danglam dawn
Toyota Innova chhuak thar, Hycross hming thlaka Maruti lirthei anga tihchhuah mai tur a nih hmel na a danglam neuh neuh erawh a awm dawn a. A design leh styling hrang hrangah a danglam ve hret hret dawn a, a ngai ang chiaha a hming thlak tawp erawh a ni dawn lo a. NEXA lirthei dang ho angin design hrang hrangah kawng eng emaw ti taka an thuhmun theihna tur leh ti Maruti Suzuki riau turin thlak danglam neuh neuh a awm dawn a ni.
A chhunglam pawh hi tunhnaia Maruti Suzuki lirthei man to lo chhuak ho nen a thuhmun viau hmel a. Maruti Suzuki lirthei chhunglam design kan hmuh thar ho nen a inan viau hmel a ni. A nghahchhan lamah chuan Toyota TNGA-C platform nghahchhana duan a ni dawn a, naturally aspirated petrol khawl leh strong hybrid petrol khawl, Innova Hycross thara kan hmuh ang a hman ve mai hmel bawk..
Lei tur tam nghal huk thei lo maithei?
Toyota Innova Hycross hi tlangzarh a nih tirh atangin lei tumtu an tam em em mai a. Tunah pawh hian a thar lei tur tan pawh a nghah chhung a rei em em a. A man to ber chi phei chu company lamin tunah hian booking an titawp rih tawp a ni a. Maruti Suzuki lama va supply zung zung hi anmah Hycross tur siam nen Toyota tan hian a awlai vak dawn rihin a lang lo a. Hei vang hian lirthei lei tur tam nghal huk chu a ni lo maithei a, leitu leh duhtu erawh a ngah viau a rinawm a ni.
Tlangzarh hun tur
Maruti Suzuki chuan tunhnaiah Fronx an tlangzarh a, hemi zawh hian an lirthei tlangzarh leh tur liantham tak chu Jimny a ni a. He premium MPV changkang leh tha tak tur hian Jimny hi a zui ve mai a beiseiawm a. July thla vela a lo chhuah hi media hrang hrang beisei dan a ni a, engpawhnise, company lam thu ngaihchan zel rih a ngai dawn a ni.