UN-in a chhut dan chuan India rama mihring cheng chu mi 1,42,57,75,850 an ni ta a, China khumin khawvela mihring tamna ber ram a ni ta.
India hian kum 10 dan zela chhiarpui a neih thin chu kum 2021 khan neih tur ni mah se hripui leng avangin a nei thei lo va, hei vang hian sorkarin mihring cheng zat dik tak a nei thei rih lo. China erawh chuan kum 2020 khan neiin hei hi a hnuhnung ber, a vawi sarihna a ni.
UN hian India leh China-a mihring awm zat hi pian pun chak dan te, thi zat leh pem lut leh chhuak chhinchhiah atangin a chhut a ni.
India leh China-ah hian mi tluklehdingawn 1.4 chuang ve ve chu an cheng hrim hrim a, kum 70 chuang zet chu khawvela mihring cheng hmun thuma thena hmun khat chuang mah an cheng tawh.
China-ah hian nakum atangin mihring hi a tlem zawngin an kal dawnin a lang a. Nikumah khan mi maktaduai 10.6 chuang piangin thi zat aiin an tam awrh chauh va, hei hi nau piang an tlem tak vang a ni a. UN chuan Chinese mipui hi a tlem zawng zawngin an kal rih ang a, tun kum zabi kal mek zawh hmain tluklehdingawn an tling lo hman dawn niin an ngai.
India-ah pawh nau piang zat hi a hniam zawngin a kal ve tho va. Kum 1950 chhova nu pakhatin fa 5.7 zel hring thin ang kha tunah erawh pahnih zel chauh hring ang an ni tawh a. Heti chung hian India hi a pung zawngin a la kal zel ang a, kum 2064-ah an tam lai ber tawngin hemi hnu atang hian a tlem zawngin an kal ve dawn ta tih an sawi a ni.