Aizawl : ZPM PAC member TBC Lalvenchhungah Mizoramin eiru do ngam party mai ni lo eiru hrem ngam party a mamawh niin a sawi.
Inrinnia Hachhek North Block ZPM huaihawta Kawrtethawveng-a ZPM Hachhek Thalai intawhkhawmah thu sawiin TBC Lalvenchhunga chuan, ram hmelma lian ber eirukna chu do mai lo a, eiru hrem ngam party ramin a mamawh niin a sawi a. Ram siam tha turin a sawiseltu mai ni loin, a siam tha tu ni turin politics hi thalaite’n an luhchilh a ngai tih a sawi.
ZPM Thalai President Dr. C. Lalrammawia pawhin thu sawiin, kum 2023 inthlanpui chu kalphung thar leh kalphung hlui indona a nih thu a sawi a. “ZPM chu midangte beidawng tura fuihtu ni lovin, ram rorelna tha zawk nei tura beiseina nei kalkhawm kan ni zawk,” a ti a. ZPM sorkar tir kawngah mipuite ngaihdan a inan vek tawh thu sawiin, mipuite’n sum thiltihtheihna an kalsan tawh thu a sawi a. “Khawpui leh thingtlang politics a danglam tawh lo a ni,” a ti bawk.
He hunah hian KJ Lalbiakngheta, Secretary, ZPM General Headquarters, AMC Corporator Christina Roluahpuii Sailo, Vanlalsailova leh Jeje Lalpekhlua te’n thu an sawi bawk.