October ni 29, 2022 hnuah Mizoramah COVID-19 kai nunna chan an awm zui loh vang vang hnuin, May ni 1, 2023 chawhma dar 11:20 khan COVID19 kai pakhatin nunna a chan leh a. COVID19 kai nunna chan hi hmeichhia kum 63 mi niin, natna dang khirh tak takin a tlakbuak lai a ni.
Mizoramah October ni 28, 2020-a COVID19 kai nunna chan an awm atanga tun thlengin mi 727-in nunna an chan tawh a, heng zinga 465 te chu mipa niin, hmeichhia 262 an ni.
Mizoramah COVID19 kai nunna chan kum 2020-ah mi 8 (mipa 7; hmeichhia 1) an awm a, kum 2021-ah mi 537 (mipa 340; hmeichhia 197) an awm. Kum 2022-ah mi 181 (mipa 118; hmeichhia 63-in nunna chanin, kuminah hmeichhia 1-in nunna a chan tawh bawk.
Health deptt hnuaia Integrated disease surveillance programme (IDSP) report-a a lan danin thla liamta April thla khan Mizoramah COVID19 kai 82 hmuh chhuah leh an ni a, tun thla-ah ni 1 (Thawhtanni) khan COVID19 kai 34 hmuhchhuah an ni bawk.
Thla liamta April thla chhunga COVID19 kai hmuhchhuah 82 zinga 75 chu Aizawl district ami niin, Kolasib 3, Serchhip 2, Khawzawl 2 te an ni a. May ni 1-a COVID19 kai hmuhchhuah 34 zinga 18 chu Aizawl district niin, Kolasib 9 leh Serchhip 7 te an ni.
April thla chhunga COVID19 hmuhchhuahte Genome sequencing result hriat theih tawh chinah Omicron variant chi thum – XBB.1.16.1, XBB.1.16 leh XBB.1.9.1 hmuh a ni a. Heng zinga pahnih – XBB.1.16.1 leh XBB.1.16 te hi variant thar leh zual niin, Omicron variant dangte aiin inkaichhawn a awlsam a, naupang leh kum upa lamah a thawk bik niin Health deptt. hotute chuan an sawi.
Helath deptt. hotute chuan tunhnaia Mizorama COVID19 kai hmuhchhuah thar te chu symptom nei deuh vek an nih thu leh tunhnaia zin chhuahna nei lo, tualchhunga hri kai nia hriat vek an nih thu an sawi a. Hri kai hmuhchhuah thar zingah kum 15 hnuailam leh kum upa lam an tam thu an sawi bawk.
Tunhnaiah COVID19 kai hmuh thar leh awm nual mahse, mipui tan chiaina tur erawh a awm lo niin, Health Deptt. hotute chuan an sawi a. COVID laka himna tura pawimawh hmaituam, kut silfai ngun leh midang hnaih lutuk lova awm leh a dang te tha taka zawm a pawimawh thu an sawi bawk a ni.