American rock band Aerosmith chuan rimawi khawvela an kum 50 tlinna leh tour hnuhnung ber tur ni bawk chu US leh Canada ram tuamin tawp an khar dawn ta.
Ruahman dan chuan ‘Peac Out’ tour hi Setember 2 hian Philadephia ah khuhhawnna neiin, January 26 ah Montreal-ah a tawp zui ang.
Guitarist Joe Perry-a’n band member te’n kum 70 an tlin hlawm tawh avangin mangtha tih mai loh tur chu duhthlan tur dang an nei tawh chuang lo, tih a sawi.
Kum 1970 a din tan Aerosmith hian an hla lar tak takte an thlawh dawn a, Grammy award pali dawng tawh leh Run-DMC nena, ‘Walk This Way’ hla hmanga rimawi khawvel sawi danglam dawrh tute hi a tawpna a ni bawk a, an chepui miah miah hle tura ngaih a ni.
Aerosmith hi rimawi khawvela band hlawhtling ber zingah an tel a, khawvelpumah record maktaduai 150 chuang hralhchhuak tawhin, an hla- ‘Dream on’, ‘Sweet Emotioni’ leh ‘I Don’t Wanna Miss A Thing’ te chu a lar zual hle a, Mizo thalai tam tak pawhina an sakpui theih leh kawihpui theih hla an nei nual bawk. 2001 khan an hlawhtlinna lawmpuiin Rock & Roll Hall of Fame-ah ropui taka lawmluh an ni.
‘Peace Out’ tour hi fan te tan chuan an band duh ber mai te LIVE-a an chetchhuahna hnuhnung ber hmuh theihna remchang a ni dawn a, an zinkawng hlawhtling tak mai zawhpuina remchang a ni nghal bawk ang.
Aerosmith hi bluesy hard rock band ang te pawha sawi theih an ni a, live performance an nei tha in, an zaipu ber mai Steven Tyler che vel phei chu pui tak hi a ni ringawt a, mit leh beng titlai ber tu a tling hial.
An rimawi leh hla te hian rock band thahnem tak te lai ril a fan hneh a, an mahni atanga inzir leh rimawi tuihalna chhawktu atana hmang a, lar zui ta band tam tak an awm.
Rimawi khawvela best-selling bands of all time zinga langsar tak te hi an thiam leh theihna la sang hle mah se, khuarel dan pumpelh theih a ni bawk si lova, band anga tour an neih hnuhnung ber tur chu ui tak chungin an kalpui a ngai dawn ta.