- HC Vanlalruata
Aizawl khawpui laili lai tak, Lammual leh a chhehvel luah mektu Assam Rifles battalion hmunpui a awmte hi engtikah nge an hmun thar tura ruahman Zokhawsang lamah an insawn phei ang tih hi hriat a la har a. Insawn phei tura Ministry of Home Affairs aţanga thupek dinglai awmsa a ni a. Insawn phei hi an chak viau lo niin a lang a, chhuanlam an siam rei-in Aizawl khawpui laili an luah rei ta hle mai.
Assam Rifles-te hian helai hmun hi Mizote’n Aizawl an luah vak loh laiin an hmunpui-ah an lo hmang tawh a, Cachar Levy tih hming pu a kum 1835 a din kha, kum 1917 khan Assam Rifles ti a thlak a lo ni a. Aizawlah hian an awm rei tawh hle a. ‘Lushai Hills’ ti a vuah a nih lai a Mizoram awptu Superintendent dawta thuneitu sang ber chu Assam Rifles Commandant kha a ni mai awm e. Tun thlengin Assam Rifles Commandant (Mizovin ‘Manding Sap’ kan tih) Capt. Loch-a hmingin commandant chenna hi ‘Loch House’ tih a la ni ta reng a. Kum 1893 vela sak niin Mizo chanchin chhuitu ţhenkhat chuan an sawi.
British (Kumpinu) sorkarin India a awp lai kha chuan an thu kha a lal ber a ni mai a, India ram kha chu an ram lak (colony) pakhat mai a nih avangin mimal zalenna chu sawi loh awptu an nihna angina an thu thu a ni. India ram a zalen hnu khan Mizoram (Mizo Hills district) chu India Constitution a Scheduled 6-na hmanga din, autonomous district council a nih avangin ram neitu nih chungchangah tlangmite lo chuan a ram chhungah ram an nei thiang lo. Chuvangin Assam Rifles pawh hian neitu nihna chanvo (right to ownership of land) an nei lova, luah theihna chanvo (right to occupation) chauh an nei ta a ni.
Kum 1988 bul lama Assam Rifles te’n nunau an kahlhum vak avanga Aizawl khawpui laili aţanga chhuak tura khatihlaia Chief Minister Pu Laldenga leh Assam Rifles thuneitu sangte inremna kha chu kan sawichhuah leh kher pawh a ţul lem love. Chutih lai erawh chuan han pen zawk loh theih loh thil a awm. Kum 1966-a Mizoram a lo buai khan Mizote tana zalenna sang ber sual chhuah tuma beite do tura sipai lo chhuakte khan Mizoram hmun hrang hrang, chhak leh thlang, chhim leh hmarah mimal ram an luah luihsak a nih kha.
Khatianga sipaite’n (Border Roads Organisation tiamin) an luah luihsak kha kum 1986-a MNF leh India sorkarin inremna an siam hma pawhin luah man (rental charges) pek an lo ni tawh ţhin a. Inremna thuthlung ziah a nih hnu-ah pawh pek chhunzawm zel an ni. Ram luah man pek chungchangah hian engkim a dik felfai vek lovang tih a rinawm a. India sipai vakvelin zunram thiarna takngialah pawh an hman loh ram neitute thlengin ram luah man hi an la niin sipai luah ram neitu intelkhawm chuan kum 1986-87 chho vel khan thuchhuah an lo siam tawh.
A mak ta ber chu India zalen hma daih aţanga Assam Rifles-te’n an ram luah chhunga Mizo District Council hunlai aţanga kum 2006 thlenga Assam Rifles luah mek ram chhunga LSC leh house pass nei mi 61 zet an lo awm thei kha a ni a. Hetianga dik lo tak leh huamhap taka zak hauh lova ram lo neitu (an ram neihna lehkha kirtu mi 10 tiam lovin) te hi sorkar hian an ram neihna lehkha hi a hnawlsak a ngai a ni. A hnawlsaktu tur Revenue department erawh chu ram neihna lehkha lo petu an ni lawi a. Tuna an invaukhanna pawh hian eng ual a thlen a rinawm lem loh.
Helam thil chingchivet hi kalsan ta ila. Assam Rifles hian Aizawl khawpui laili a an battalion hmunpui hi chhuahsan ta sela engtin nge an chhuahsan ram hi kan cheibawl anga kan enkawl zui ang tih hi nasa taka ngaihtuahna hman ngai a ni. Mizoram assembly chuan an chhuahsan tur ram hi mimalin an neih theih lohna tur leh vantlang tan chauhva hman turin dan a lo siam tawh a. Chuti chung chuan sorkar/vantlang ram nék pawisa lo kan tam em avang hian na taka thil kalpui a ngai dawn a ni.
Tam takin an hlauh ber pakhat chu Assam Rifles chhuahsan tur ram hi an chhuahsan tak tak hunah mimal kuta pek awm lo mah se, sorkarin concrete building sak na’n a ît ang a. Hmasawnna kan thawh thiam dan kan hriat chian tawh avangin hmasawnna hmingpu-in in kan sa khat leh khup mai ang tih hi a ni. Aizawl khawpui lirthei tawt lutuk tihzia-awmna atan chuan kawngpui siam belh leh, hmun laili a nih avangin lirthei hunna tur siam chu a ngai ang. A dang zawng chu ramngaw khup tura siam a ngai a. Thing phun belhin Pachhunga University College baka ‘Aizawl chuap’ atana kan hman hi a pawimawh hmasa ber chu a ni.
Mipui punkhawmna ang chite hi Aizawl khaw dai hmun thawla sawn chhuah a, Lammual chheh velah hian lirthei hunna siam a ţul tawh zawk a. Assam Rifles in an battalion hmunpui hi an chhuahsan hunah chuan helai hmun hi ramngaw nuam taka kan siam leh ngei ngei a pawimawh a ni. Mihring punkhawmna ang chi kan siam belh chuan plastic aţanga thilsiam leh bawlhhlawh dang paihna hmunpui kan din leh dawn tihna a ni ringawt.
New Delhi an sawi ang deuhvin Aizawl khawpui a cheng tam tak hian an chenna mek leh lu pawh nghah an tumna khawpui ai hian an chawr chhuahna khua an hmangaih zawkin a lang fo ţhin a. An chen renga Aizawl khawpui ai chuan an khaw welfare committee te an ngai pawimawh zawk zel niin a lang bawk. Hetiang a rilru zau lo tak kan nih hlawm avang hian Zawlkhawpui hian duattu a tlachham hle a ni.
Chuvangin tuna kan sawi mek, Assam Rifles chhuahsan tur ram cheibawl a enkawl dan tur hi tun aţanga bengsik leh fimkhur taka ngaihtuah a hun ta. An chhuah huna a dinhmun ngai aia ţha leh nuama kan siam theih loh pawhin tuna an bahrik leh thil dangte pawh ţhiat a, ramngaw nuam tak siam tura kan ngaihtuahna kan sen a ngai a ni. Chutianga kan ti thei dawn lo a nih chuan an awm reng zawk hi a ţhat a rinawm.