Aizawl: MPCC president Lalsawta chuan MLA inthlan lo awm turah sorkarna an chang a nih chuan an party manifesto pakhatna, ‘Tang Puihna’ hmangin eizawnna kawng hrang hranga a mamawhte tan tanpuina cheng nuai hnih an pe dawn tih a sawi.
Thawhlehni khan Congress party hian an party pisaah manifesto pakhatna an tlangzarh tawh an zir ho a. He hunah hian Lalsawta chuan ‘Tang Puihna’ a sawi fiah a. Eizawnna kawng hrang hrangah a mamawhte tan tanpuina cheng nuai hnih an pe dawn nia sawiin, “Chhungkaw mala tanpuina pek bakah kut hnathawktute leh kawng hrang hrang hlawhtlin tuma beitute hnenah sorkarin an mamawh intawm tur thil a tihsak dawn a ni,” a ti.
Lalsawta chuan mamawh intawm tur thil heng – kawng siamna, tui lakna, khawl leina leh society ten an mamawh ang chi-ah phei chuan cheng vaibelchhe tel thlengin sorkarin an mamawhna zawnah tanpuina a pe dawn tih a sawi.
‘Tang Puihna’ tanpuina an pek tur chu sem policy nen a danglam nia sawiin, “A mamawh leh hlawhtling ngei tura thawktute hnenah chauh ‘Tang Puihna’ hi pek tur a ni,” a ti bawk.
MPCC president hian budget kalphung hi planning commission hunlai nen a danglam tawh avangin sum an enkawl thiam phawt chuan Congress party sorkar lai pawh khan a tulna apianga hman theih turin kum khatah NEDP hnuaiah Rs. vaibelchhe 1,000 (cheng nuai hlir nuai khat) zet an dah thei niin a sawi.
NITI Ayog hnuaiah chanvo, state budget hi ruahmanna fel tak nei a enkawl a nih phawt chuan Mizoram mipuite chhanchhuahna tura ruahmanna an siamte hi harsatna awm lo in an tihlawhtling thei tih hrechiangtu a nih thu a sawi a. “Sorkar kal tawhah thlarau MR thahnem tak kan umbo tawh a, thlarau MR umbo avangin kum khatah sorkarin Rs, nuai 4,900 zet a humhim thei a ni,” a ti bawk.
He hun hi MPCC vice president leh MPCC Manifesto Drafting Committee chairman ni bawk, Lal Thanzara’n a kaihruai.