Health Minister Dr R Lalthangliana hoin nimin khan Mizorama Covid-19 hripui dinhmun an thlirho.
SAD Conference Hall, MINECO-a thutkhawmah hian Covid chungchanga Mizoram dinhmun an sawi ho a. Hma lam hun hriat lawk a nih loh avang leh thil lo thleng leh thei turah damlote enkawl dan tur leh a hmachhawn dan tur, lo inruahman dan tur siam tha tih niin a buaipuitu turte an inruat nghal a, damdawi leh hripui dona hmanraw hrang hrang Mizoramin a neih mek dinhmun zirchiana a tul anga ruahmanna siam nghal tha an tih bakah puipunna hmunah mask vuah tha tura mipuite inzirtir leh a tul tih sawi a ni.
He hun kaihruaitu, health minister chuan tun hnaia Mizoramah hri kai pung deuh mah se mipuite leh official-te tan chiaina tur a awm rih lo niin a sawi a. Hetih rual hian an hun tawng tawhte atanga an fimkhur chuan an inveng thei tih a hriat a, hripui laka invenna an hriat tawhsa te, a bik takin hmai tuamna (mask) vuah uluk kha an ngaih pawimawh thar leh chu a pawimawh dawn nia sawiin, “Eng emaw lo thleng thut thei thilah kan talbuai loh nan phili si lova kan lo inruahman lawk erawh a tul a ni,” a ti.
Thutkhawma tar lan a nih danin tun hnaia Mizorama Covid positive hmuhchhuah tharte hi natna nei deuh vek an ni a, ram pawna zin chhuak awm lovin, tual chhunga hri kai nia hriat vek an ni a. Hri kai hmuhchhuah thar zingah naupang kum 15 hnuai lam leh kum upa lam an tam hle bawk.
Covid-19 danna hi sorkar laipuiin a thlawnin a pek tawh dawn loh avangin Mizoram sorkar a mamawh angte a lei ve zel a ngai tawh dawn a, RT-PCR test kit leh hri kai damlo na zualte enkawlna tur damdawi man to chite a tul anga lei turin National Health Mission-in ruahmanna an siam fel tih tar lan a ni.
Thutkhawmah hian health minister leh Health & Family Welfare Board Vice-Chairman Dr ZR Thiamsanga, MLA, H&FW Principal Secretary Esther Lalruatkimi bakah health department mi pawimawh dangte leh ZMC hotute an tel a ni.
IDSP, H&FW report danin kumin April thla khan Covid positive 82 (Aizawl – 75, Kolasib – 3, Serchhip – 2, Khawzawl – 2) hmuhchhuah an ni a, May 1 khan Covid-19 positive 34 (Aizawl – 18, Kolasib – 9, Serchhip – 7) hmuhchhuah an ni.