India ram chuan a ram chhung bika thlawhna hmanga ni khat thil thua zin chhuak tam ber ni a tawng thar a, mi 4,56,082 zet an tling.
April 30 khan India-ah hian a ram chhunga thova tum tur thlawhna 2,978 zet thlawk chhuak a awm a ni.
Aviation Minister Jyotiraditya Scindia chuan, “Covid hnuah hian tual chhunga zinna hi nasa takn a thang a, hei hi India thanna lantirtu a tling,” tiin Twitter-ah a tar lang.
India-ah hian hripui a len hnuah eibar dinhmun sang leh mekin hei hi khualzin lama sum hmuh a pun nasat vang a ni pakhat.
Kum 2023 kumtir thla thum chhung hian ram chhungah thlawhna hmanga zin mi maktaduai 37.5 chuang zet an awm tawh a ni.
Kumtir thla thum chhung bikah hian nikum aiin 51.7% zetin an tam zawk tih Directorate General of Civil Aviation chuan a tar lang.
“Covid chhung kum hnihah khan thanna a awm miah lo va. Tuna kan hmuh ang erawh chuan nasa takin a thang thung a ni,” tiin aviation analyst Mark Martin chuan BBC hnenah a sawi.
Martin-a chuan hripui len hnuah hian a vawi khat nana thlawhnaa zin hi India-ah nasa takin an pung niin a sawi bawk.
India-a thlawhna veivak hi a ram sum thawh chhuah, GDP (Gross Domestic Product) ang bawkin a let hnih zetin a thang a, Asia-a economy lian ber pathumna chawi kangtu pawh a ni.
A hma lawkin International Air Transport Association (IATA) pawhin India tual chhunga thlawhna hmanga zin hi hripui len hma ang thuak a ni leh tawh tih a sawi bawk a, February, 2019 ai khan 2.2% chauhvin a tlem tawh zawk mek niin a sawi a, a umpha tep.
India hi tual chhunga zinte hnena airline-in thutna an pek an luah pawh 81.6% zet niin khawvelah a sang ber a ni a. Ram changkang zawk – US, China, Japan, Australia leh Brazil ten an phak lo.