Aizawl: Social Welfare Minister Er. Lalrinawma’n Sethawn-a Jordan Centre thlawhin thawktute leh enkawl mekte a kawm a. Bialtu MLA K. Laldawngliana leh Social Welfare Director Zodingpuii’n centre tihchangtlun zel dan tur te an sawiho.
Jordan Centre-ah hian September 7, 2022 atang khan ruihhlo avanga harsatna tawkte enkawl tan an ni a, thla hnih chhung enkawl thin niin mi 402 enkawl an ni tawh a. Honorary worker 41 leh thawktu nghet 15 an awm.
Thawktute chuan a hmuna awmchilh tur doctor an mamawh thu minister hnenah hian an lo thlen a. Mamawh zual lam khawmna tur lirthei leh enkawl laite taksa sawizawina tur khelmual an mamawh thu te an lo thlen bawk.
Social welfare minister chuan ruihtheihthil chu ram leh hnam hmelma hlauhawm tak a nih thu sawiin, a laka fihlim tura inenkawlna hmun chu tangkai taka hman a tul thu a sawi a. Sim tak takna nun nei tur chuan mahni inhnehna nun leh mahni inthunun theihna nun neih a pawimawh thu sawiin, beiseina nena centre pantute beiseina tihhlawhtlin a nih theihna turin inpekna thuk tak nen an hna kalpui turin thawktute chu a chah.
Centre a tlawh hnuah minister chuan Thingdawl-a ‘After Care Home’ tlawhin hmalak dan turte a enpui a. Bilkhawthlira tribal affairs ministry atanga sum hmuh Rs. vbc 24 vel hmanga sak mek, Eklavya Model Residential School pawh tlawhin hna kal mekte a enfiah nghal.
Eklavya Model Residential School sak hna thawh mekah hian building 11 sak mek niin kumina sak zawh hman an inbeisei thu thawktute chuan minister chu an lo hrilh a. Tribal tana ruahman bik school-ah hian pawl 6 atanga pawl 12 tan arts, science leh commerce zirna awm tura ruahman a ni.