Aizawl: Mizoram University vice chancellor thar, Prof. Dibakar Chandra Deka-a’n nimin khan Raj Bhavan-ah Larsap Dr Hari Babu Kambhampati a hmu a, larsap chuan Mizoramah lo lawmin, a mawhphurhna pawimawh tak tha taka hlen thei turin duhsakna a lo hlan.
MZU VC thar chuan a mi mal chanchin, zirna lam leh zirtirna huanga a tawnhriatte larsap chu hrilh hmasain India ram university zinga la naupang fal tak leh thangduang taka hotulu ber mawhphurhna a chelh tur chu phurawm a tih thu a hrilh.
Prof. Deka chuan MZU hlawhtlinna hrang hrangte chu tuna thawk mek leh hotu hmasate thawhrimna leh inpekna a nih thu sawiin, MZU hmasawn zelna tura pawimawh leh hmalak hmasakna tura pawimawh nia a hriatte larsap chu a hrilh bawk.
Nimin vek khan MZU VC thar chuan Chief Minister Zoramthanga pawh hmuin MZU hmasawnna tura pawimawh hrang hrangte a sawi bawk.
Prof. Deka hian Thawhtanni khan MZU VC pangana ni turin a hna a zawm a. Gauhati University-ah M.Sc zovin, IIT Kharagpur atangin M.Tech zirchhuak lehin Tokyo Institute of Technology, Japan ah Post- Doctoral Diploma (DTTT) a zo va. Gauhati University atangin D.Sc in Chemistry a zo bawk.
Department of Chemistry, Gauhati University-ah professor senior ber niin, kum 2011-2014 chhung khan head of department a ni a. Chemistry field-ah a hnathawh that avangin Royal Society of Chemistry, London-in kum 2016 khan FRSC chawimawina a hlan a. American biographical institute, USA-a Research board of advisors-ah member niin, January, 2017 – December, 2019 chhung khan All India Association of Chemistry Teachers-ah President a ni bawk a ni.