Russia-in Ukraine a run meknaah December thla atang khan Moscow hian an sipai 20,000 chuang an chân tawh niin US-in a chhut.
Heng bakah hian 80,000 velin hliam an tuar bawk niin National Security Council thupuangtu, John Kirby chuan tun hnaia intelligent-te atanga an hriat a puang.
Thi zinga a zahve vel hi Wagner mercenary company-a mi niin heng mite hi khawchhak lama Bakhmut khawpui beitute an ni.
Russia hian nikum atang khan khawpui lian lo tak hi lak tumin a bei tawh a, an mi leh sa an hloh nasatna hmun a ni.
Moscow hian tunah hian Bakhmut hmun tam zawk an thunun tawh a; mahse, Ukrainian sipaite hnuaia la awm a awm tho va. He khawpui lak hi khawi lam ve ve tan pawh pawimawh a ni.
Ukrainian thuneitute chuan Russia sipai a tam thei ang ber thaha an reserve-te tihtlem zel an tum tih an sawi.
Kirby huan, “Russia hian Bakhmut-a an hlawhchham hnuah Donbas region lam an hawi leh,” tiin thuthar lakhawmtute hnenah a awi a. “Russia hian hmun pawimawh tak tak chin chu a la thei lo zel a. Sipai 1,00,000 chuang an chân tawh niin kan hria a, heng zinga 20,000 hi indona tak taka thi an ni,” a ti.
Ukrainian sipai thi zat a sawi ve loh chhan sawiin, “Anni chu a tuartu an ni a, Russia hi a beitu zawk an ni,” a ti.
US-in an sipai thi zat a sawi chungchangah hian Moscow chuan engmah a la sawi lo.