Aizawl: BJP Mizoram Pradesh chuan Chawngte-a buaina chhuak chu pawi an tih thu an sawi a. He kut inthlakna thlengah a bul tumtu-ah MNF party worker an puh.
Nimina thuchhuah an siamah Thawhlehni zana Chawngte bial, Kamalanagar V-a buaina chhuahah kut inthlakna hial a thleng chu pawi an tih thu an sawi a. He buainaa a bul tumtu ber chu MNF sorkar CADC-a sorkar hnathawk pakhat, MNF supporter ni bawkin sorkar hnathawk chunga MNF tana a campaign vang niin an sawi a. Buiana chhuah chhan, a bul tumtu nia hriat chu Chawngte Police Station-ah hruai hial a nih thu an sawi.
BJP Mizoram chuan buaina bul tumtu ber hi BJP hruaitu, Nirupam Chakma (minister hlui)-in sorkar hnathawk chunga campaign tawh lo tura a hrilh bakah BJP member leh MNF member-te chu MNF campaigner thlenna in kawtah kalin campaign chawlhsan tur leh haw tura an hrilh hnuah inhnial buaiin MNF campaigner hian BJP member hmeichhe pakhat chu na takin kut a lo thlak niin an sawi.
CADC inthlan boruak tichhe zawnga MNF party mi leh saten zu rui chunga buaina an siam chu CADC-ah MNF party-ten beisei an neih lohzia a tilang chiang hlea an ngaih thu BJP Mizoram hian an sawi a. Buaina siam a, a bul tumtu leh hmeichhe kutthlaktu chungah Chawngte Police-ten action mumal an lak leh lak loh Nilaini thlenga hriat a la ni lo te, MNF-ten campaigner atana sorkar hnathawk an hmangte chu an dem tak zet tih sawiin, “Dan pawisak lohna hian sual tihawlsamna a thlen thin avangin tun hnuah ti tawh lo turin Pu Zoramthanga kaihhruai MNF party kan ngen a ni,” an ti.