Aizawl: MNF General Headquarters, Media & Publicity Dept chuan Serchhip bialtu MLA Lalduhoma, ZPM Leader chu a bial mipuite nasa taka bumah puhin, “Heti em ema a bial mipuite a bum nasa hi mak kan ti,” an ti.
Nimina Aizawl Press Club-ah thu thar thehdarhtute an kawmnaah MNF General Secretary VL Krosshnehzova chuan April 28, 2023 khan Thenzawlah kalin Serchhip bial bye-election neih a nih dawna Lalduhoma’n Thenzawl leh a chhehvel tana hmalakna tur a puante zir chiangin an enfiah tih a sawi.
An zirchianna atangin Lalduhoma hian intiamnate tihhlawhtlin a nei mumal lo a, tihlawhtling tura hmalakna pawh a nei loh thu sawiin, “A ngawihsan hmiah ringawt mai a ni,” a ti.
VL Kroshnehzova chuan Thenzawl leh a chhehvel tana hmalakna tur a puan zingah, ‘Private company nen government organisation ka dawr fel tawh a, agreement kan sign nghal mai dawn a ni. Handloom chuangchangah hian MLA ka tlin leh phawt chuan reilo te chhungin he kalphung thar hi ka siamsak thei che u a ni, tih hi ka puang duh a ni,’ tiha a sawi chu an zir chiang a. Thenzawl-a handloom hruaitu thenkhat leh heti lama eizawngte an kawm kualte chuan an bialtu MLA hian private company emaw, government organisation emaw agreement sign-pui emaw a neih an hriat loh thu leh handloom chungchangah an bialtu MLA hian eng hmalakna mah a neih an hriat loh thu an hrilh niin a sawi.
‘Thenzawl hian college a mamawh ve tawh a ni. Tunah hian min hmui turte pawh kan be fel tawh a, kan sawiho nual tawh a, tun atanga reilo teah hian college nei turin hma kan la chho tawh dawn a ni,’ tia a sawi pawh hmalakna a nei lo tih a sawi.
‘Vanva Dam khi kan enkawl tha dawn a, a hmunah ka han en tawh a, a thing thuap mai a, khi khi kan khuah belh ang a, a ko khi tlemin kan tisang ang a, Thenzawl water supply scheme a nih bakah a thlang lawkah khian Maudarh zau a awm a, Maudarh ram khian an huana tui lak nan an hmang thei dawn a ni,’ tia a sawi pawh Lalduhoma hian hmalakna pakhatmah a nei lo niin a sawi bawk.
VL Krosshnehzova chuan MLA fund atang Thenzawl damdawi (CHC)-a ultrasound dah tura sawi te, Lau lui project chungchang a sawi te leh ‘Khawpui pakhat, nuai 10 vel awm theihna na na na hi chu min tihsak theitu tur khawvelah hian min donate-sak thei tur hi hmuh theih hi ka inzuam em em a ni,’ tia intiamna te chu hma a lakna awm hriat a nih loh thu a sawi.
Thenzawl bik an zirchianna atangin Lalduhoma hian a bial mipuite dawt a hrilh nasa hle tih an hmuhchhuah thu VL Krosshnehzova chuan a sawi a. Heti tak maia a bial mipui a bum duh hi mak an tih thu leh mahni bial mipuite pawh dawta a bum duh danah hian a kutah Zoram hi dah ngam a nih loh thu a sawi a ni.