India-a thlawhna chuan man tlawm, Go First chu an tlachhe mai thei dinhmuna an dinna laka an him theihna tura buaipui ngai buaipui nan ni thum lo awm leh tur chhung an thlawk dawn lo.
Hetih chhunga anmahni lo dawr tawhtute chu pawisa an pe kir vek dawn tih an sawi.
Kum 2019-a Jet Airways an tlakchhiat hnua India-a airline tlachhe leh hmasa ber an ni.
Go First chuan tun dinhmun an thlen chhanah hian US-a engine siamtu, Pratt & Whitney chu puhin an khawl hmang an thlawhna tam tak chu an tlak leh thin avangin eng emaw zat dintir an ni.
Pratt & Whitney khawl hmangte chhiatna a pung nasa hle a, hemi chungchangah hian company chuan hma a la ngai tur a ni tih Go First thuchhuahah chuan tar lan a ni.
Go First chuan an thlawhna 25 zet, Airbus A320neo thlawhna an neih zinga a zahve zet an dintir a ngai a, hei vang hian Rs. vaibelchhe 108 chuan hloh leh insenna an neih phah niin an sawi.
Airline hian Pratt & Whitney hi order zawm lovah an puh bawk a, ‘April 27, 2023-a serviceable spare pe tura an tih chu an pe lo’ niin an sawi bawk.
Pratt & Whitney erawh chuan March, 2023 khan an tifel vek tawh tih an sawi a, buaipui zui tur a awm tawh lo niin an sawi.
Indian Civil Aviation Minister Jyotiraditya Scindia chuan, “Sorkarin airline hi a theih dan danin a pui dawn,” a ti.
Indian conglomerate lian, Wadia Group ta, Go First tlachhia hi airline sector-a inelna boruak a san lai tak a ni.
November khan India-a airline lian ber pahnihna pathumna, Air India leh Vistara chuan hmun khata an inchhun fin thu an puang.
Kum 2019 khan hetih laia India-a lian ber pakhat, Jet Airways chuan leiba tluklehdingawn 1 chuang neiin an tlachhe tawh.