Ultimate Fighting Championship a fighter ropui leh heavyweight champion ni lai Jon Jones chuan mixed martial arts a chawlhsan har tawh dawn lo niin a sawi a. Stipe Mioicic nen an intum hnuah chawlh a rilruk tih a sawi.
Jones hian tunhma pawhin social media kaltlangin chawlh lam hi a lo sawi zeuh tawh a. November thla hian Miocic nen hian intum tura ngaih an ni mek.
“Stipe Miocic ka hneh hnuah hian ka tan chona dang vak a awmin ka hre tawh lo. He infiamnaah hian ka tal rei tawh a, ka hun hman tawhte thlir chuan putar ka ni tawh. Hun rei tak training ka nei tawh a, hliam neuh neuhte ka nei ve a. Hrisel that hi a pawimawh. Ka chhungkua leh ka fate tana hun hman hi ka duh bawk. Hei vang hian a tawp hun hi ka thleng har tawh dawn lova, ka hun a thleng tur hi a lawmawm ka ti. Ka zinkawng hi ka chhuang hle.” tiin a sawi.
Jones hi UFC fighter ropui ber a mi tam takin an chhal a ni a, light heavyweight champion ni reng thin niin UFC-ah a zawna tlawm lo rei ber (19) a ni a. UFC title fight-ah vawi 15 inlan tawhin a la chak vek bawk.
Kum 35 mi Jones hian heavyweight champion hlui Francis Ngannou nen an intum dan kawng a awm chuan la inel zel erawh a inhawn thu a sawi tel.