Aizawl : Labour, Employment, Skill development & Entrepreneurship (LESDE) department hmalaknain tun thla ni 9 leh ni 10-ah Millennium Centre chung zawlah Mizoram Mega Job Fair buatsaih a ni dawn a. He fair atan hian LESDE department chuan ram chhung leh pawna sector hrang hrang atangin company lian leh changtlung tak takte sawmin, Mizorama hna zawnglaite tan hnathawh tur an chhawpchhuahsak dawn a ni.
Mizoram mega job fair-ah hian ram chhung leh pawn atangin company hrang hrangin – financial institutions, banking, healthcare, services, automobile, IT, FMCG, tourism & hospitality, beauty & wellness etc. ah te hnathawh tur an chhawpchhuak dawn a. Thiam thil bik nei leh nei lemlote pawh a chhawrtu tur te duhzawng mi an nih chuan hna an hmu thei dawn niin a buatsaihtute chuan an sawi.