- Mahmuaka Chhakchhuak
Tunlai hian tute emaw chuan Mizo Bible thar tur an buatsaih dawn ni awmin mi sawi ka lo hria a. Ka theih ang angin ka han ngaihven nghal a, anmahni chu ka hre hauh lo nain an Bible thar tur nia sawi erawh chu ka nei thei hlauh thung a, In lamah chik takin ka han chhiar a, a then laiah chuan fiah zawk deuha hriat tur hi chu a han awm tak nain a tam zawkah chuan a danglam hle mai a, mipui vantlang chhiar atan chuan a tha dawn em ni aw tih turte pawh a awm hial awm e.
Kum la rei vak lo kaltaah khan Mizo Parallel Bible siam tumin thla thum chhung vel chu chhun leh zanah chawl loin ka lo buaipui ve tawh a. Ka theih ang angin Mizo tawng Bible chi hrang awmte hi ka lakhawm a, engzat chiah nge awm ka hre lo nain Bu ruk chu ka hmu theih chhun a ni. Chung Mizo tawnga ziak Bible chi hrang ka lakkhawmte chu hengte hi an ni a;
PATHIAN LEHKHABU THIANGHLIM 1963 Edition
PATHIAN LEHKHABU THIANGHLIM C.L – 1994 – 95 Edition.
PATHIAN LEHKHABU THIANGHLIM O.V – Reference 2005 Edition.
KAN LALPA LEH CHHANDAMTU ISUA KRISTA THUTHLUNG THAR – By Bible International
PARALLEL BIBLE (NKJV – MIZO) – By Bibles for the World
BIBLE THIANGHLIM – CATHOLIC EDITION
Heng Bible parukah hian Bible Society of India (BSI) kutchhuak pathum a tel a, hengte chu a danglam dawn em ni kan lo ti mai thei a, hetiang hian a danglam dan han sawi ila; PATHIAN LEHKHABU THIANGHLIM kan tih bik kher, BIBLE SOCIETY OF INDIA buatsaihte hi a phek hmasa lamah hian ‘THE HOLY BIBLE Mizo (Lushai) – O.V……’ tih ziak i hmu ang a, a chhut kum pawh a lang ang. Heta O.V tih hi thenkhatah chuan ‘C.L’ tihte, ‘O.V – Reference/ Re – edited’ tih tea inziak a awm bawk ang a. Kum tarlan hi chu an chhuah kum tihna a ni.
O.V tih hi ‘Old Version’ tihna a ni a, a awmzia chu he Bible letling tute hian innghahna ber atan Mizo Bible a bu puma kan neih hmasak ber, kum 1959 kuma kan neih kha ringin, thumal hriatthiam awlsam zawka dah zelin leh tawngkam ti danglam (ti tunlai a ni ber zawk ang chu) hlek hlekin an buatsaih a, chumi bakah chuan English Bible en a lo ngaih bawk avangin English Bible tam tak zingah uluk taka thlangin, Revised Standard Version (RSV) chu innghahna tlak ber niin an hmang a, Hebrai leh Greek Bible-te hi chu loh theihloha an hman a ni bawk a ni. O.V – Reference tih hi a awmzia berah chuan a bung leh chang te a phek awl remchangah dah belh niin a bu tawp lamah pawh dah a ni bawk thin. ‘Re- edited’ tih a nih chuan endik leh a ni a, siamthat a ngaihna laiah siamthat a ni tihna a ni mai.
C.L awmzia chu ‘Contemporary Language’ tih leh ‘Common Language’ tihna a ni ve ve thei a, a dik ve ve bawk a ni. He mi Bible an lehlin hi chuan Hebrai leh Greek Bible mai bakah English Bible-ah chuan Today English Version (TEV) hi an thlang thung. Hei pawh hi ‘Re- edited’ a awm ve tho bawk a ni. Heng bakah hian BSI chuan Rawngbawlna atan bika an buatsaih ‘Hmangaihna Aw’ leh ‘Hmangaihna Thuchah’ an chhuah tho bawk a, chungte chu Re-edited bawk an ni. Tichuan, tunah hian BSI chuan ‘R.V’ a buatsaih leh bawk a, ‘R.V’ awmzia chu ‘Revised Version’ tihna a ni a, chu chu ‘O.V’ leh ‘C.L’ en kawp tho siin Hebrai leh Greek Bible mai bakah English Bible atangin Revised Standard Version (RSV) chu hmang tawh loin English Standard Version (ESV) an hmang ta thung a, hei hi belhchian dawl tak tura ngaih a ni.
Hetianga BSI kutchhuakte hian danglamna an neih avangin leh Mizo tawng thoa Bible dang alo awm avangin chungte chu lakhawmin Thuthlung Thar chin hi a hlawma dah turin kan han buaipui kha a ni a, alo hautak ngang mai a, mimal mai chu tlin chi pawh a lo ni lo. Amaherawhchu chhun leh zan chawl loa han buaipui takah chuan hlawkna tam tak kan nei thungin thumal ziah dan in anglo chungchang leh thu hlawm khat ziak dan danglamte pawh hmuh a niin hlawkna chu neih a ni tho mai. Chulam chu remchang dangah kan la sawi zawk ang a, tunah chuan Mizo Bible thar tur ti mai ila, a bu chuan an la peih chiah pawhin a hriat loh nain kan Bible neih thar tur lam hi han sawi leh zawk ila.
Hetiang hian tlem tlemin an ziak dan han la chhuak ila;
Joh. 3; 5 – Isuan a chhâng a, “Tih tak meuhvin, tih tak meuhvin Ka hrilh a che, Mi tupawh chu tuiah leh Thlarauvah a pian loh chuan Pathian lalram chhûngah an lût thei lo.
6 Tîsaa piang chu tîsa a ni a; Thlarauva piang chu thlarau a ni.
7 In pian nawn leh tûr a ni tih Ka hrilh che kha makah ngai suh.
8 Thli hi ama âwnlamah a tleh thin, nangin chuta mi a rî chu i hria e, nimahsela khawi atanga lo kal nge tih leh, khawiah nge a kal zel dawn tih i sawi thei lo: chutiang chu Thlarau atanga piangte chu an ni e,” a ti a.
I Joh. 1; 1- Nunna Thu chungchâng, kan kutte chuan an vuan tawh leh kan thlir liam tawh, kan mittein kan hmu tawh a, atir atangin chû chu kan ngaihthlak tawh kha;
I Joh. 2;17 – Tin khawvêl hi a boral a, tin chuta châkna pawh: mahse ani Pathian duhzawng titu erawh chu kumkhua atân a awm reng ang.
I Timo, 1;3 – Nang chu Ephesiah châm hle hle tûrin Ka ngên ta che angin, Makedonia ram chhûnga Ka kal lai khân, anni chuan eng thurin zirtîrna dang mah an zirtîr tawh loh nân nangin thenkhat chu hrilh rawh tiin,
Gal. 2;2 Tin, laihlanna hmangin Ka han chhova, tin Jentailte zînga Ka hril chanchin tha chu anmahni hnênah Ka hlân ta a; nimahsela anmahni mi lian deuhte hnenah chuan mi mal takin, chuti lo chuan eng hmanruate pawh hmangin thu lawi lovah Ka tlan hlauh dah ang e, a nih loh leh, Ka tlan thlawn dah ang e.
I Thess. 4;1 Chû bâkah chuti a nih chuan unaupate u, Lalpa Isua hmangin nangni kan ngênin kan fuih che u a ni, engtin nge nangni chu in awm dan leh Pathian tilâwm tûrin nangni chuan keimahni chungchâng in pawm tawh ang khan, chutiang bawkin nangni chuan in ngah lehzual a ni tiin
MARKA 1;1 Pathian Fapa Isua Krista chanchin tha lo awm tanna chu;
2 Hei hi zâwlneiteah khân ziah a nih angin, “Ngai teh, Keiin ka palai in hmai hmâah ka tir a, ani chuan in hmâah in kawng chu a buatsaih ang”
3 “Thlalêra mi pakhat âu mek chuan, ‘Nangni Lalpa kawng buatsaih ula, a kalkawngte ngilin siam rawh u,’ a ti,” tiin.
4 Johana chuan thlalêrah a baptis thîn a, tin,sualte sûtna atân a rilru thlâk thlengna baptisma a hril thîn.
5 Tin, Judai ram zawng zawng leh anni Jerusalem mi zawng zawngte chu a hnênah an kal chhuak a, tin, an za chuan Jorlan luiah amah hmanga baptis an ni ta a, an sualte puang chhuakin.
TT. 2;38 Tichuan Petera chuan an hnênah, “In rilru thlakthleng ula, tin, in sualte sûtna atân nangni zinga mi tin Isua Krista hmingin baptis ni rawh u, tin nangniin Thlarau Thianghlim thilpêk chu in chang dâwn nia.
39 Thutiam kha nangni hnênah leh in fanaute hnênah leh hla tak ami zawng zawng, Lalpa kan Pathianin a koh tûr zata tam dik chiah hnênah a nih avângin,” a ti a.
40 Tin, thu dang tam tak nên ani chuan a nemnghet a, a fuih bawk a, “Hê thunun hâr chhuante atang hian mahni inhum rawh u,” tiin.
41 Tichuan anni a thu lâwm taka dawngtute chu baptis an ni ta a: tin a nî vek chuan mi sangthum soul lai anmahni hnêna belhchhah ni tawh an awm ta a.
I TIMOTHEA
3;1 Hei hi thu leh hla nei dik a ni, Mi pakhat hian bishop chanvo a duh chuan, ani chuan hnathawh tha chu a duh a ni.
3;2 Chuti a nih chuan bishop chu sawisel bo a ni tûr a ni, nupui pakhat nei, insûm thei, rilru dik tak, nungchang chungchânga tha, mikhual laka thatna chhuah mi, zirtîr tûra thiam a ni tur a ni;
3;3 Uain heh mi ni lo, mi vautu ni lo, hlâwkna bawlhhlawh lama duham lo; nimahsela dawhthei, insual buaitu ni lo, sum ngaina lo;
3;4 Zahawm taka ama chhûngkua ngei awptu, ama fanaute thu hnuaia indahnaah urhsûn taka enkawl mi;
3;5 (Mi pakhat hian ama chhûngkua ngei engtia awp tûr nge a hriat loh chuan, Pathian Kohhran chuani chuan engtin nge a enkawl ang?)
3;6 Ring thar mi ni suh se, chuti lo chuan chapovin a awm anga ani chu diabola thiam loh chantîrna chhûngah a tla ve dah ang e.