NBA Playoffs khelh mekah Western Conference semi-final inkhel nghahhlelh chu Nilaini zingah khelh tan a ni a. Los Angeles Lakers in champion lai Golden State Warriors 117-112 a hnehin game 1 an la nghal.
Vawi 17 NBA champion ni tawh tan Anthony Davis chuan hma hruaiin point 30 leh rebound 23 a la a. LeBron James chuan point 22 leh rebound 11 nei ve bawkin Lakers in champion lai lakah an tanrualna an chakpui.
Fourth quarter-ah Lakers hian point 14 a hma hruai lai an nei hman a, nimahsela Warriors in inkhel tawp lamah an shooting tha lantirin an hnaih leh hman viau a. Minute khat leh a chanve a awmin an point a inzat hman.
Lakers in awmze nei a team duan an nih chu an chakpui a, Dennis Schröder leh D’Angelo Russell ten an point mamawh a hun takah neiin an chak theih phah.
An chak hnuah Davis chuan, “Champion lai an ni a, he team thatzia hi kan hrechiang. Chuvangin an laka hmahruai ringawt hi a tawk lova, kan inthlahdah hlek pawh a thiang lo.” tiin chak zel an mamawh thu a sawi.
Eastern Conference semi-finals-ah New York Knicks in 111-105 in Miami Heat an hneh let ve a, 1-1 in best of seven series-ah an intluk mek.
Knicks tan Jalen Brunson chuan point 30 a score a, Julius Randle chuan point 25, rebound 12 leh assist vawi 8 a nei.