Aizawl : Ni hnih chhung awh tur Dengue natna chungchang inzirtirna chu nimin khan Chanmari YMA Hall, Aizawl-ah tan a ni.
Nimina bul tan Dengue natna chungchang inzirtir hun hi State Vector Borne Disease Control Programme (SVBDCP) buatsaih niin Aizawl Municipal Corporation (AMC) hnuaia Local Council, MHIP leh MUP te nen hun hmanho a ni a. Mizorama Dengue natna hluar zel tur laka inven nan leh Dengue awm lo tura hma lak dan te inzirtir hona hun atan hman a ni.
He hunah hian Dr. Vanlalsawma, Director of Health Services chuan kalkhawm te lawmna thu sawiin, Mizoram a Dengue natna pun chhoh zel dante a tarlan bakah Dengue laka inveng tura khawtlang, kohhran leh pawl hrang hrang te nena thawhho that a tulzia a sawi a. “Natna do hi Health Department hna a ni a, natna tuartu erawh chu mipui te kan ni, chuvangin natna do kawngah kan tan rual a, kan thawhho a tul hle a ni,” a ti.
Dr Chawngthanchhunga, State Prog Officer pawhin chipchiar zawkin Dengue natna in Mizoram a nghawng dan sawiin hun a hmang bawk.
Programme thawktuten Dengue natna nihphung te, natna enkawl dan te bakah Dengue vei lo tura invendan kawng hrang hrang te zirtirna hun an hman bakah, Local Council, YMA, MHIP, MUP leh kohhran te nena hmalak ho dan tur sawihona hun neiin, hlawkthlak takin he hun hi an hmang a ni.
Dengue hi India ram hmun hrang hrangah a hluar hle a, hetih rual hian Mizoramah pawh kum tin he natna vei zat hi pung chho zelin, nunna chan hial kan nei ta a ni. Kum 2021 ah Dengue vei hmuhchhuah zat 83 niin, kum 2022 ah Dengue vei zat hi pung chho in, mi 1868 vei hmuhchhuah a ni a, vanduaithlak takin mi 5 laiin nunna an chan a ni. Kum 2023 Jan atanga ni 19 April thleng hian Dengue vei hmuhchhuah mi 142 an awm tawh bawk. India ram pumah kum 2022 Jan – Oct thla chhungin Dengue vei mi 110473 (nuaih khat sing khat zali sawmsarih leh pathum) awmin, mi 86 in nunna an chan a ni.