District Institute of Education and Training (DIET)-a thawk, Association of Mizoram DIET Employees (AMDE) chuan an service chungchanga harsatna an tawh leh thla ruk chhung hlawh an lak loh avanga ni thum chhung hna an thawh loh hnuah sorkar atanga thu lawmawm an dawn avangin nawrh an titawp lailawk.
Hemi chungchanga thuchhuah an siamah AMDE chuan hlawh an lak rei loh avang leh an service-a harsatna an tawh chungchang chu sorkarin ni 15 chhungin chin felsak a tiam a, an hlawh atan state sum tum tur chu state budget-ah zaa 40 dah luh te, thla ruk chhung hlawh an lak loh chu a vaia pek fel vek te, an service-a harsatna an tawh chungchang ching fel tura DP&AR leh finance hotute nen sawihote sorkarin a tiam tih an sawi.
Sorkar thu tiam avang hian lungawi lohna an lantir chu titawpin, hna an chawlhsan lailawk chu chhunzawm leh an rel a, sorkar hmalakna chu an thlir reng dawn a, an hun tiam chhunga hmalakna a awm lo a nih chuan indefinite strike kalpui an tum thu an sawi a ni.
Tar lan tawh thin angin AMDE chuan an service chungchangah harsatna hrang hrang an tawh avang leh hlawh an lak theih loh avangin May 1 atang khan hna an chawl a, sorkar hotute nen indawrna an neih hnuah sorkar hmalak tumna ngaichangin nawrh an huaihawt chu an titawp lailawk rih ta a ni.