Russia chuan Ukraine-in drone hmangin Kremlin beiha President Vladimir Putin thah an tum niin a sawi.
Nilaini khan Russian sorkar chuan president thah tumna a awm thu hi puangin sorkar news agency hrang hrangin an thehdarh zui nasa hle.
Putin-a hian hliam a tuar lo va, Kremlin building chhia pawh a awm lo niin Russian thuneitute chuan an sawi.
Kremlin chuan Russia hian hetiang beihna chhan let theihna dikna chanvo a neih thu sawiin, ‘mi firfiak’ chetna niin an sawi bawk.
“Kremlin chuan uluk taka a thlirin mi firfiakin ruahmanna fel tak nena a beihna, May 9-a Victory Day parade neih hmaa president thah an tumna niin a ngai,” tiin sorkar thupuanna, RIA chuan a tar lang a. Putin-a hian a hun hman dan tura ruahman a tidanglam chuang lo va, a tih dan pangngaiin engkim a ti niin a tar lang bawk.
Thawhlehni zana drone hmanga beih a nih lai hian president hi Kremlin-ah a awm lo hrim hrim nia sawi a ni a, Nilaini pawh khan Moscow daiha a chenna, Novo Ogaryovo-ah hna a thawk daih niin RIA chuan a tar lang bawk.
Ukrainian thuneitute chuan Putin-a thah tuma Russia-in an puhna chungchangah hian thu chhak chhuah an la nei lo.
Kremlin-in president thah tumna a awm tih a puanah hian an sawi ang thil a thleng tih lantirna tur an pho chhuak lem lo va, thuchhuahah pawh an tar lang kimchang lem lo.
Russian social media-a video thehdarh pakhat, military news outlet Zvezda pawhin an tihchhuahah chuan Kremlin Palace pui ber pawn lam, a hungna bul lawkah meikhu chhuak lai erawh a lang.
Video hi Nilaini zing hma takah khan Mosvka River kam, Kremlin ep chiaha cheng tual chhung miten an thehdarh hmasak ber a ni a, hei hi Russian chanchinbuten an la chhawng thuai a, la chhawngtu zingah hian military news outlet Zvezda enkawl Telegram channel pawh a tel.
President thah tumna a awm tih sawi mah se Kremlin chuan May 9 Victory Day parade chu ruahman lawk angin Moscow-ah neih a ni tho dawn niin sorkar enkawl TASS news agency chuan a puang.
Moscow-in Ukraine a puh chhiat mek lai hian Kyiv sipaite chu nikum atanga Putin-a’n a lo beih tawhna chhang leta an luahsak ramte chhuhsak leh tumin an inpuahchah thar leh mek.
Finland-a zin mek, Ukrainian President Volodymyr Zelenskyy chuan khawthlang ramte thawhpuina a dil leh mek a, Germany pawh a tlawh dawn bawk.